「叫人衝、自己鬆」——正被香港警方通緝、流亡澳洲嘅前民主黨議員許智峯，人稱「瘋鴿」嘅佢，向來以「峯人瘋語」見稱。不久前佢喺社交平台發貼文，大放厥詞，發動所謂「如水計劃」，公然呼籲港人喺下個月舉行嘅立法會選舉中投白票，對其口中嘅「暴政」作出「反制」云云。

香港啲小黃人又聽佢廢噏，竟然轉貼佢嘅貼文，日前（9日），廉署拘捕3名涉轉載貼文嘅人士後，「瘋鴿」即晚「跪低」，又再貼文呼籲公眾停止轉載喎！阿哥，即係殺咗人先叫人放下屠刀，做個「洗心革面」嘅好人？依家黃絲盲舂舂跟瘋鴿轉貼叫人投白票，佢哋唔知香港已修例將公開煽動他人投白票列為刑事罪行，最高可判監3年咩？

其實，網上世界並非無王管，許智峯以待罪之身呼籲他人犯法，可謂罪大惡極；啲黃絲反對派又「笨人出手」。廉署拉人消息一出，許智峯先假惺惺話，如果運動已觸動政權神經，並開始搜捕市民，公眾就應停止公開轉載相關內容，以保障自身安全喎！「瘋鴿」又死撐：「白票廢票杯葛都係合法權利」！喂，仲嫌害啲「兄弟手足」唔夠？

有網民睇唔過眼，直斥許好比喺外國做「冷氣軍師」，炮轟佢間接害到香港人！亦有指佢係逃犯，反問佢「攞景定贈興」？

有人就睇穿呢啲着草海外嘅攬炒派，用啲最低成本嘅「抗爭」行為，安全輕鬆做「鍵盤戰士」，一旦成功爭取到比中港官員或官媒點名狠批、喊打喊殺，咁佢哋就得米，可以大條道理向現時身處嘅國家申請政治庇護，獲得一般香港人要花上數百萬元積蓄先能夠換取外國居留權，都真係除笨有精！

講來講去，就係「精人出口，笨人出手」，黒暴以來，咁多學生被黃師、黃政棍荼毒洗腦反政府反中央而做咗炮灰，至今仍然有唔少人未知「醒」，都真係令有識之士心痛！
天道無親，唯德是與！像許智峯呢的「峯人瘋語」，明害人仲有人咁多人中招，不但印證「人一黃，腦便殘」，而係進一步話畀大家知根本冇得救。睇見害佢嘅人逍遙法外，有啲人入名牌大學，慶生吹蠟燭食蛋糕，都唔知幾咁開心快樂，自己就入冊日日洗廁所洗到天荒地老，仲要死撐「永不後悔」！香港教育之失敗，睇見都揪心！

原圖：星島日報

https://std.stheadline.com/realtime/article/1133066/