因新冠疫情而停辦一年嘅渣打香港馬拉松近日復辦，可以話係疫情爆發後首個大型盛事，吸引數以萬計市民參與。不過就發生咗一啲小插曲，有參加者因為穿有「香港加油」嘅衣服，或者身上紋有「香港加油」嘅紋身，而被要求更換衣服或遮蓋有關紋身。

其實田徑總就發過兩次聲明，指運動唔應該加入政治元素或者係口號。咁「香港加油」呢四隻字到底有冇政治元素？或者因為2019年反修例暴亂為香港人帶嚟嘅傷痛實在太深刻，以致好多香港人對某啲字句特別敏感，可能唔想畀其他人誤以為自己係支持黑暴嘅人之一，就避用有關字句，免生麻煩。

筆者就認為，可以從兩個層面去睇「香港加油」。首先從形象上去睇，喺黑暴期間於網絡上流傳甚廣嘅兩隻字，即豎看「香港」橫成「加油」嘅意瞑字，過去一直被廣泛用於黑暴文宣之中，咁你話好人好者無啦啦展示呢兩隻字，背後有冇政治意味？相信大家心知肚明。

另一層面就係，口嗌「香港加油」又有冇問題？疫情期間，全國上下高呼「中國加油」、「武漢加油」；過去不久嘅東京奧運會，相信大家睇國家隊或港隊比賽嘅時候，都會不自覺喺心默念「中國（隊）加油」、「香港（隊）加油」。以上例子只屬打氣激勵，而唔係有其他政治目的，咁又有咩問題？

過去黃黑勢力最叻就係借製造輿論煽惑人心，曾經「香港加油」成為政治口號、曾經「手足」成為「水魚」代名詞、曾經「黑衫黑褲」成為暴徒標記。但最黑暗嘅時代已經過去，我哋戰勝黑暴、戰勝疫情，何不走出傷痛，迎接未來？

原圖：星島日報、文匯報

https://www.wenweipo.com/a/202110/25/AP6175f35be4b08d3407e1da9d.html

https://std.stheadline.com/realtime/article/1766168