「北國風光，千里冰封，萬里雪飄。望長城內外，惟余莽莽；大河上下，頓失滔滔。山舞銀蛇，原馳蠟象，欲與天公試比高。須晴日，看紅妝素裹，分外妖嬈。

江山如此多嬌，引無數英雄競折腰。惜秦皇漢武，略輸文采；唐宗宋祖，稍遜風騷。一代天驕，成吉思漢，只識彎弓射大雕。俱往矣，數風流人物，還看今朝。」

已故國家領導人毛澤東於1936年寫下足以流傳千古嘅不朽經典《沁園春．雪》，除咗歌頌祖國壯麗山河，更重要嘅係讚美「今朝」，亦即係當時嘅革命英雄。

超過大半個世紀後嘅今日中國，正喺中華民族偉大復興之路上穩步前進，「革命」二字看似既陌生又遙遠，似乎只會喺歷史教科書上先會見得到，但其實「革命」腳步從未停止，一直都喺每一個中國人身邊發生緊。

新冠肺炎肆虐全球，正當絕大部份歐美國家正為如何抗疫而搞到焦頭爛額嘅時候，中國經濟早就已經逐步復甦。然而中國又點會放過呢個拋離世界嘅大好機會？內地政府近月動作頻頻，不斷推出革新政策，正正係為日後與列強競爭做好準備！

當中最人所共知嘅莫過於恒大事件，內地早於去年毅然出手，畫下「三條紅線」為債務管控，可惜地產商恒大一直未能達標，以致陷入債務危機，前途未卜。其實中央政府又點會唔知一但恒大爆煲，必定牽連甚廣？不過中國樓市泡沫嚴重，終有爆破一日，與其等佢唔知幾時爆，不如喺自己可以控制嘅情況下，及早篤爆佢，呢一切相信都盡在中央政府掌握之中！

後來內地又推出「雙減」政策，即係「減輕學生功課」同「減校外培訓負擔」，國內補習集團首當其衝，教育龍頭新東方股價急瀉，難道中央在落決策之前冇考慮過呢種可以性？當然唔會冇啦！儘管如此，為咗中國莘莘學子，仍然堅持做正確的事！

又例如近年發展如日中天嘅電競產業，中國一直都係電競大國，電競產業鏈帶嚟嘅經濟利益不可估量，就連下屆巴黎奧運會都要將電競列為比賽項目之一。不過，經歷過鴉片戰爭嘅中國人深明「毒品」之害，絕對不能重蹈覆轍，為眼前短暫利益而葬送一代年輕人，終於下令限制未成年人遊戲時間，免青少年人沉迷遊戲，影響國家未來，此舉實乃壯士斷臂，好！

敢於以退為進，用今日之失換明日之得，實非一般人所能。但慶幸中國出了一位有膽識、有謀略、有遠見、能人所不能嘅國家領導人，一直帶領14億炎黃子孫前進，「數風流人物，還看今朝」！

原圖：原圖：新華社，無綫新聞截圖