屈穎妍於6月4日的那篇《事在，人不為》，對當今特區政府嘅怠政、嘆慢板可謂當頭棒喝！一些明明不必動用「國安大法」嘅違規違法行為，像令旺角六四紀念館「關門」或掃蕩法輪工盤據多年嘅地點，原來簡單用《公眾娛樂場所條例》和《公眾衛生及市政條例》已足以剷除其叛國亂港招貼和海報，並檢控違例者！

呢！早前又有區議員將街板變「民主牆」悼「6.4」，遭地政總署撤銷展示准許，食環署將其移除，並稱日後或被追討移除費用。事實正如屈穎妍所言，只要根據《公眾人物衛生及市政條例》已可清除，不必動用到《港區國安法》呢把尚方寶劍去斬妖除魔，可見事在人為！

豈能過晒鐘 玩失蹤

庸官終於「做嘢」！民政事務局對住咁多黃議員，又豈能再過晒鐘，玩失蹤？去年民主派搞「35+初選」共設251個票站，其中約一半為區議員辦事處。民政事務局終開聲，指根據區議員操守、酬金等指引，區議員如以營運開支償還款額及其他實報實銷嘅津貼，須確保辦事處係用於執行區議會職務，若用以作與區議員事務冇關嘅用途，有關開支將不會獲得發還！

換言之，一切區議會嘅開支使費要用得其所，用於執行區議會職務，切勿將辦事處淪為亂港基地，若有區議員提供議員辦事處作初選票站，可能被定性為「協助顛覆國家政權」，不排除被DQ！只要政府揸正來做，撇除怠政陋習，則一切「掛羊頭賣狗肉」嘅政治把戲都難得逞！今屆區議會運作劣評如潮，唔少區議員被補，多與反修例黑暴有關。政府仍要徹底剷除啲黃議員，記住事在人為，勿為官避事！

古有師爺筆法諷庸官

事實上，本屆政府施政無能，靠害市民！防疫如此，一些民生「無小事」如覓地建公屋、港英時代遺下來的寮屋問題也如此，搞咗好幾10年，依然原地踏步，「暫准存在」嘅寮屋仲有成38萬間，這不是「庸官怠政」是甚麼？古代有所謂「師爺筆法」，諷刺那些刑名師爺至叻將事情高高掛起，其刀筆秘訣總結成8個字，叫做「反復顛倒，無所不能」。舉個例，要使老者勝，就話「不敬老宜懲」！要使少者勝，就說「年長而不慈幼，為何？」要言之，神係佢鬼又係佢！

叧有8個字又係好使好用，曰「事出有因，查無實據」！意思係「捉人、審人，冇錯係有大把原因，只係細查起來又搵唔到證據噃！

「師爺筆法」認真冇得頂，善用之可謂無往而不利，加上「官」字兩個口，不作為只要廢噏當秘笈，好官我自為之，咁就個個月穩袋30幾40萬元！香港對高薪怠政嘅庸官，的確係幾好都有，點捨得走！至於蟻民如筆者，只能學龔自珍「我勸天公重抖擻，不拘一格降人才」，下屆政府，真正出幾個「為人民服務」嘅父母官！

原圖：政府新聞網圖片

https://www.news.gov.hk/chi/2020/07/20200706/20200706_183019_904.html