人稱「魚毛」嘅資深藝人余慕蓮半年前因肺纖維化入院，一度情況危殆，但魚毛姐相當頑強，上月底更可以出院。資深傳媒人汪曼玲昨日（22日）同朋友去魚毛姐家中探佢，仲上載咗合照，從中可見魚毛姐精神幾唔錯。汪曼玲引述魚毛姐話，「其實我精神好好，就係唔行得，去廁所都要印尼姐姐幫我，幫我洗澡，行幾步都要用步行架。」雖然係咁，但魚毛姐佢已經食到普通食物，生活上有印傭姐姐照顧，仲可以出街同朋友飲茶添，真係一個好消息！魚毛姐仲話之前去醫院接受標靶治療，使唔使繼續有待醫生評估。

繼續為魚毛姐加油！

原圖：汪曼玲微博圖片