最鋒利嘅刀，都有生銹嘅一日！同樣，最造反嘅政客，都有收皮認低威嘅一日！阿哈！大家必定知道，筆者講緊嘅係人稱「慢必」嘅陳志全，前立法會最出位前幾名搞搞震議員，必定有佢份！

依家慢必因涉35+初選被押，不久前透過家人，宣布退出人民力量，辭去黨主席一職，並表示從此不再參與任何遊行、集會、示威等群眾活動，亦不再參與任何類型、界別同級別選舉，也不會協助進行選舉活動！阿哥，慢必洗心革面啦！佢講畀大家知，佢已經無力玩，差在未表白如果唔使判監，一定去剃頭出家做和尚咋！

不久之前，大批民主派人士玩初選玩出禍，涉嫌違反國安法被捕，當中大部分到而家仲還押緊。依家泛民坐監嘅坐監、著草嘅著草、退黨嘅退黨、官司纏身嘅食不知味、睡不安寢，昔日豪情，「五大訴求，缺一不可」，今只剩哀音泣訴：只要自由，無一訴求！

嗱！有指支聯會嘅五大綱領及口號涉違國安大法，繼梁耀忠議員辦事處早前退出支聯會後，陸續有民主派人士退出。有報道引述支聯會秘書蔡耀昌指，現時支聯會約有200個會員團體，過去數月暫有3個辦事處申請退出。呢，公民黨主席梁家傑亦與支聯會劃清界線，跳出來稱公民黨從冇加入過支聯會。

國安法出鞘

梗係，國安大法劍出鞘，你估同你玩泥沙！慢必都算識時務者為俊傑，擲臭水拉吓布狂囂高叫，有10皮嘢薪酬就過癮啫！走去維園嗌「五大綱領及口號」，分分鐘就同國中重犯黎智英一齊係赤柱監獄洗廁所食監躉飯，恨唱「友誼萬歲」都唔使咁進取啩？

訟棍梁家傑撲出來同支聯會割席，其用心「良苦」，路人皆見矣！佢都冇改錯名，果然係識時務者為俊傑！公民黨同白鴿黨已今非昔比，如今樹倒猢猻散，白鴿折翼哀鳴不在話下，公民黨收聲如鵪鶉亦一一浮現。呢，郭榮鏗已率先走佬加拿大，其餘嘅如楊岳橋、譚文豪、郭家麒、李予信，因「參與35+」初選被控串謀顛覆國家政權罪，現正被還押，4人都經已退黨！

世易時移，支聯會已非司徒華時之支聯會，大江東去，依家啲蝦兵蟹將，即使「寧願最後徒勞無功，也不選擇無動於衷」。今年即使有六四悼念活動，隨着泛民時辰一到紛割席，維園縱有燭光已非昔日情懷！

原圖：港台新聞圖片，星島日報

https://news.rthk.hk/rthk/ch/component/k2/1544887-20200820.htm

https://std.stheadline.com/politics/article/1292101/