曾幾何時，香港人出街食飯時，氣氛寂靜得可怕，唔敢大聲亂講嘢，因為你永遠唔知自己幾時會踩親「手足」條尾，萬一咁啱畀「黃衛兵」聽到，咁你就真係大鑊了。批評「手足」會有乜嘢後果？我就唔敢想像喇，但喺嗰一段最黑暗嘅時期，香港人除咗失去言論自由，就連免於恐懼嘅自由亦都失去埋。

其實，政見本無顏色之分，「藍絲」往往亦好少會自認「藍絲」，佢哋只不過係一班有理性思維、對社會抱有熱誠嘅普通香港市民，面對國家需要改善嘅地方，或者政府有啲乜嘢做得唔好，佢哋一樣會批評。不過，偏偏有一班自詡「黃絲」嘅人形物體，幻想自己同極權抗爭，事事以立場行先，四圍批鬥香港人，只要你為國家、為政府講一句公道說話，都會被標籤為「藍絲」。

不過，如果真係要為政治立場搞二元對立嘅話，正常香港人又點可能揀做「黃絲」？「藍絲」之所以成為「藍絲」，係因為仲有人性、仲有良知！

黑暴猖獗嘅時候已經過去，一眾「台前幕後」唔係坐監就走佬，黃獨思想喺香港再冇立足之地，香港人唔需要再過擔驚受怕嘅日子。香港新生代女明星莊錠欣近日更開自認「藍絲」，可見身為「藍絲」絕對唔係乜嘢羞於啟齒嘅事，香港人好應該重奪話語權，大大聲同黃友講：「我係藍絲我自豪！你吹啊？！」

原圖：莊錠欣微博