疫情持續，失業率創新高，26萬人丟飯碗！喺呢個時勢，唔少人會羨慕打政府工嘅約17萬公務員，起碼工作穩定，準時出糧，不必如一班私人機構嘅打工仔，公司經營唔掂，往往會被率先裁員！疫情嚴峻下，唔少公務員在家工作，而基層打工仔就冇呢支歌仔唱，更擔心會被鼓椒炒魷或停薪留職，收入全冇保障，庸官又死都唔肯設立短期失業救濟金，仲講風涼話指開工不足被迫放無薪假係「工作分享」！

呢，政府反而對手執鐵飯碗嘅公務員愛護有加，今個財政年度預留預留2.46億元，獎勵逾4500名公務員旅行，獲奬勵公務員仲可以同一名親友同行，二人最多獲5.5萬元資助，可於疫情緩和後出發，奬金報銷限期更加延長至明年3月底。阿哥，依家香港亂象叢生，百廢待舉，連通關都成問題，筆者想過澳門食個豬扒包、水蟹粥都冇符，為何公務員有迫切性趕着去旅行、去癲去玩？咪忘記，呢筆錢係納稅人嘅血汗錢吖！

政府今年1月要求全體現職公務員喺4周內宣誓，或簽署聲明擁護《基本法》及效忠香港特區。呢個係好簡單嘅要求。其實，任何人入職某間公司都要嚴守該公司守則及紀律㗎啦，這是基本常識吧！

籠裏雞作反 如家常便飯

回想港英時期對所有入職公務員皆有嚴格政治審查，所謂「查三代」是也！嗰陣冇公僕有異議，更加冇可能會有「吃飯砸鍋」呢回事！只係97後政府放縱公僕，禮崩樂壞，加上庸官怠政得過且過，公僕自然得寸進尺，慢慢病變成妹仔大過主人婆，公僕籠裏雞作反竟如家常便飯！

公務員事務局局長聶德權日前表示，約有17萬名公務員已簽妥及交回聲明。截止今年4月1日，有129名公務員不理會及拒絕簽署及交回聲明。佢答覆議員查詢時就話，相關部門已去信要求未有簽署及交回聲明嘅人士解釋，並已收回部分回覆；局方會按個案實際情況，根據公務人員管理命令第12條，基於公眾利益要求佢哋離開公務員隊伍，過程中會給予時間佢哋作申述。如職位涉及公務員敍用委員會職權範圍，會徵詢委員會意見，當局作最後決定並通知有關公務員，強調會嚴肅快速跟進云云。

有議員關注被起訴公務員是否仍可獲發薪金？聶局長指有關涉嫌參與反修例非法活動被捕嘅現職公務員，如果佢哋被警方落案起訴嘅話，仍然可以支取一半薪金。

都話港府係全港最慷慨嘅僱主，庸官無能，照樣升職加薪；「吃飯砸鍋」停職，仲可以一直支半薪，生活無憂之餘又唔洗返工，打政府工被譽為「鐵飯碗」，一啲都冇誇張！

離心離德 一個都不能留

有論者指公僕知法犯法，停職支半薪又點能夠反映事件嘅嚴重性？理應「斬立決」一律炒魷，再按其性質作刑事調查。如今公僕做錯事係一邊停職一邊支薪，賞罰不明，難怪管治江河日下！聶德權所謂「嚴肅快速跟進」又係廢噏當秘笈，處理一批拒絕宣誓效忠特區政府嘅公務員，依然畏首畏尾，為何不是「拒簽即炒」，知唔知乜叫做「治亂世，用重典」吖？

公務員被捕就應「即捕即解」，拒簽效忠就手起刀落，大家道不同不相為謀，呢129名拒簽署交回聲明嘅公務員，宣個誓都企硬，擺明離心離德，根本就一個都不能留！

政府要顯出有管治嘅決心！連拒簽一紙宣誓都議而不決，拖拖拉拉，睇見都令人把鬼火！還奢談甚麼有效管控？

近幾年來，香港一直在沉淪，究其因，無非係「為官怕事」和「一味怠政」！講完。

原圖：星島日報、頭條日報、點新聞

https://std.stheadline.com/realtime/article/1321736/

https://hd.stheadline.com/news/realtime/hk/1977600/

https://www.dotdotnews.com/a/202005/26/AP5ecbf2e9e4b099e085654c73.html