喺香港，警察開槍降匪雖然唔係咩新鮮事，但就絕對係一件大事，每當一有發生，幾乎都會成為全城談論嘅焦點，自不然為涉事警員帶嚟莫大嘅壓力。

維護法紀係執法者天職，警察要執行正義，實在難免動武，但當佢哋成功制服不法份子嘅時，得到嘅掌聲往往都好少，更多嘅，係排山倒海而嚟嘅責難。

「點解唔用警棍」、「點解要開槍」、「點解唔打手腳」？無論點都好，警察只要開槍，都會畀人捉住針對，喺某一撮人嘅眼中，警察既然受過專業訓練，就應該好似冷冰冰嘅機械咁執行任務，佢哋可能冇諗過，警察都係人，警察嘅命都係命！

警察執法，職責所在，本來係唔需要過多表揚，但一面倒嘅責難，就肯定會帶嚟反效果，又有邊個可以保證，自己永遠都唔需要警察救？如果執法時處處受制，最終受苦嘅又係邊個？

沙田開槍事件嘅是非曲直非常清楚，嗰一位肩負市民生命安全嘅交通警，喺應該果斷嘅時候，選擇咗果斷；咁香港人喺應該撐警嘅時候，就更應該挺身撐警，令所有執法者知道，您們從不孤單！

原圖：星島日報資料圖片

https://std.stheadline.com/realtime/article/1541896/