所謂山高皇帝遠，羅冠聰、張崑陽、許智峯、梁繼平、鄺頌晴、黃台仰、梁頌恆等人，以為人在外國中央就奈佢哋唔何，走去搞咗個《2021香港約章》，話要凝聚港人國際戰線力量，籌謀、準備光復香港嘅長遠之路。又呼籲國際社會對抗中共威權擴張，唯有結束一黨專政，先可以喺中國境內實踐民主自由云云。

大家要記住，呢班黃友係流亡，唔係遊埠，佢哋當中不少已因為涉及《港區國安法》、缺席法庭聆訊，而被香港警方通緝。著草走佬並唔係咩光彩事，你都低調啲吖！但係呢班人好似入咗Dead Body教咁，信奉「有案底可令人生更精彩」原則，壞事當好事，著草當成英勇獎章，包裝自己做「走佬明星」，幾乎日日都有人走出嚟講佢哋所謂嘅「國際戰線」，將道德價值扭曲到一個點！

必須付出代價

佢哋搞呢個《2021香港約章》，呼籲海外港人支持反抗政府，甚至鼓吹推翻中共政權。老實講，中國政府嘅強大，點可能咁簡單就被推翻，呢個道理你知我知，佢哋點會唔知？咁點解仲要搞？說穿了，咪又係想搵個名堂搞眾籌、叫人捐錢！搵食，係佢哋嘅核心價值，但係搵食搵到過咗底線，係要付出代價嘅！

日前，保安局已就事件作出回應，指《港區國安法》具有域外效力，仲話會依法處理，對違法者追究法律責任。當然，仲要睇返流亡友們身處咩國家，該國家同香港有冇引渡協議啦！流亡友們唔好以為可以避一世，歐美國家主要都係講利益，當有一日歐美列國覺得流亡友身上無利可圖之時，就係佢哋返香港找數之日！

原圖：星島日報、2021香港約章網站截圖

https://std.stheadline.com/realtime/article/717794/

https://std.stheadline.com/politics/article/1442860/

https://std.stheadline.com/politics/article/1348219/

https://std.stheadline.com/politics/article/1447888/