前美國總統特朗普冇得連任，條氣唔順，涉嫌煽動粉絲衝擊國會（請按此重溫）而遭受彈劾。經過約4小時辯論，美國參議院以56票對44票，通過彈劾朗普聆訊符合憲法，其中有6名投贊成票嘅議員，仲要係侵侵嘅共和黨黨友，一於大義滅親！

眾議院彈劾案管理人、民主黨眾議員拉斯金話，聆訊時指控侵侵煽動叛亂嘅開場發言，係基於事實，又指其所作所為，足可成為被彈劾嘅理據。聆訊期間仲播埋當日特朗普嘅演講，包括叫粉絲到國會山莊及「拼命戰鬥」嘅內容，都算係有片有真相。拉斯金又話，侵侵派代表律師出席聆，有阻止參議院聽取事實嘅意圖。另外，聆訊將於周三進行陳詞環節，雙方各有2日、最多16小時發表論點，到時又有戲睇。

輸咗就發爛渣，搞到自己臨老唔過得世，真係自己攞嚟！

原圖：無綫新聞截圖