香港電台「罐頭刀風波」搞到沸沸揚揚，唔理大家接唔接受都好，起碼人哋《南華早報》衰咗就認，做得好好睇睇，你家陣出篇聲明話「嚴厲譴責抹黑指控」，只會令本身差到貼地嘅形象深陷地核，做人冇公關，下一句係咩？大聲話我知！

香港市民本來就對呢個所謂「公營電台」冇乜期望，「罐頭刀」最多只係茶餘飯後嘅抽水談資，偏偏你要懶係理直氣壯咁「嚴厲譴責」，又偏偏有個記協要做豬隊友衝出嚟＿，大字標題「記者報道事實真相 各界停止政治抹黑」，公然向全港市民挑機。

記協既然同港台著埋同一條黃色底褲，梗係要盲撐到底，再次搬出高高在上嘅「第四權」做擋箭牌，叫市民「必須立即停止」佢口中嘅「政治抹黑」喎。成日話傳媒要監察政府，唔通市民就唔可以監察傳媒？難聽啲講句，你記協算係啲乜，憑乜嘢命令香港人？

有罐頭係事實陳述、冇罐頭刀都係事實陳述，港台當然係報道緊事實，但係咪報道緊真相就唔敢講喇！因為嗰張精心布置嘅「罐頭相」確實冇將「事實嘅全部」展現喺公眾眼前，到底有心定無意，真係港台自己先至知！但自詡捍衛新聞自由嘅記協護短護到出晒面，仲當正傳媒真係大晒咁，頤指氣使叫香港人收聲，呢個所謂記者協會存在價值絕對係零，真係執＿咗佢啦！

原圖：星島日報

https://std.stheadline.com/realtime/article/1341872/

https://std.stheadline.com/realtime/article/1298993/