拜登入主白宮，要收拾特朗普留下嘅爛攤子，恐怕也是道路艱危。

牆倒眾人推，樹倒猢猻散，這是歷史告訴大家一個敗者要面對嘅事實。

特朗普一直嘴硬不承認落敗，也不出席拜登的就職大典，再度引發各界討論，之不過佢並非第一個咁做嘅總統，歷史上有3名總統拒絕參加新總統嘅就職典禮，但都係19世紀，往事已如煙！特普普依然成為近150年來第一位不出席新總統就職典禮嘅卸任總統。拜登也表示，特朗普不出席是件好事，指他是國家之恥、世界之恥，不值得留在白宮！對佢一沉百踩嘅話就多如牛毛。好似國際貨幣基金前首席經濟學家Simon Johnson就指，特朗普不但未能承諾喺製造業創造就業機會，反而自他就任總統以來，美國喺呢一重要行業已失去逾20萬個工作崗位，對特朗普大言炎炎促進了經濟嗤之以鼻，說美國經歷咗自大蕭條以來最嚴重嘅經濟災難。仲狂踩特朗普到21世紀初，佢剩下嘅淨資產已經所剩無機，很有可能呢個就係佢從未公布稅單嘅原因喎！

第一位美國總統被彈劾兩次

歷史從來都是為勝利者書寫！這是歷史嘅鐵律！如今被民主黨人指控「煽動暴動」嘅特朗普，面臨美國史上第一位被國會兩次啟動彈劾程序嘅美國總統。說起來也真諷刺，特朗普自上任至下台，一味高呼要令「美國再強大」，乜嘢都要「美國優先」！結果，美國喺佢帶領之下，真正做到第一嘅係抗疫失敗，成為全球最多確診者和死得人最多嘅「第一」！作為全球最大經濟體嘅美國迄今累計逾二千二百萬人確診和超過三十八萬人病故！「令美國再強大」成為特朗普四年任期最大笑柄！

拜登係早前嘅記招亦憂慮表示：疫苗恐來不及係未來數月廣泛使用，仍有可能失去20多萬條生命！事實係疫情依然在美、英肆虐！單日死亡人數常創新高。

另一個令拜登憂心如焚嘅就係美國預算赤字截止由去年六月已高達37000億美元！浄孭呢兩座大山，唔單止考驗拜登嘅體能，更考驗其智慧！

事實上，美國民眾對特朗普的支持，有很大部分可說十分盲目，否則以佢嘅「政績」，喺2020年嘅總統選舉，仍可獲約7500萬張選票，這些民眾即係同佢有一樣嘅價值觀，才會義無反顧投佢「神聖一票」！有論者便舉出很多令人百思不解的問題。筆者舉一點同大家分享：特朗普在位四年，據云高爾夫球之旅，花費咗國家1.338億美元，美國總統年薪約40萬美元，折港幣約3120000萬元，大約係334年嘅年薪。特朗普話就話只收一美元象徵式薪水，但花錢如流水，卻無人可管，這是民主還是奢侈嘅國度？

看官，民主究竟是否好東西？是否好到冇得彈？凡事祭出民主是否就是真理？看看人無善志，雖勇必傷，臨尾香嘅特朗普，大家不妨再用個腦諗吓！

原圖：無綫新聞截圖