美利堅合眾國坐擁「民主燈塔」、「全球一哥」、「世界警察」等一大堆聽落好似好勁嘅頭銜，「美國夢」更加係唔少祟洋人士所憧憬同追逐嘅對象，豈料一場總統大選所引發嘅國會暴亂，讓黃友玻璃心隨住「美國夢」一起破碎之餘，更令世人明白到，「民主燈塔」並非屹立不倒，所謂西式民主，原來並非好多人所想像咁美好。

經歷過2014年非法佔中、2016年旺角暴動、2019年反修例暴亂，香港人對「撕裂」、「對立」等字眼嘅認識尤為深刻，「理性」彷彿已經離我哋好遠好遠。你以為喺美國就唔一樣咩？原來又係你贏就選舉舞弊，我贏就公平公正，只有「立場」先係「對」與「錯」嘅唯一標準。

如果將香港嘅情況套用落美國度，大家唔難想像，無論特朗普做總統又好，拜登做總統又好，美國未來幾年甚至幾十年都會好似香港咁，陷入無止境嘅社會分裂當中。唯一一唔同嘅係，香港鬧得再大，亦不過小小地區、幾百萬人口，萬大事仍有中央政府襄助；但美國作為「泱泱大國」，一個處理唔好，touch wood向最壞方向諗，爆發內戰亦唔係冇可能。

中國和平崛起威脅霸權地位，招致特朗普在位期間屢施橫手，雖然話中國人從不畏戰，但我哋亦唔會天真到以為可以輕鬆戰勝霸權，大家都心裡明白，呢場沒有硝煙的戰爭，必然係一場硬仗。儘管如此，中國人民卻從不擔心，因為歷史早就已經話我哋知，即使炎黃子孫並非百戰百勝，但永遠都會笑到最後！果不其然，「民主燈塔」今天分崩離析，一代霸權頹勢難阻，唯有中華民族偉大復興之路，方為王道！

原圖：無綫新聞截圖