俗語有話「一支竹仔會易折彎，幾支竹一紮斷折難」，鼓勵大家做事要團結，原意雖好，但事實上，竹仔始終都係竹仔，就算係一紮都好，軟弱嘅本質並唔會改變，最終仍敵不過大鐵剪「咔嚓」一下。

無奈嘅係，我哋高高在上嘅特首林鄭月娥，就係嗰支一剪就斷嘅竹仔，即使將十個林鄭綁埋一齊，咪又係林鄭咁嘅樣，對依家嘅香港唔會有任何幫助！但我哋嘅一哥鄧炳強就唔同喇，佢比百折不撓嘅精鋼仲要堅強，佢既係香港警隊嘅中流砥柱，更係香港人心目中嘅定海神針！咁你話喇，就算畀你十個林鄭加埋，又點比得上一個鄧炳強？

警隊喺鄧炳強帶領下點樣止暴制亂，我諗都唔需要喺度再多講，比起「武功」，一哥嘅「文治」先係真正令人驚嘆不已。

上年區議會選舉建制大敗，十七區區議會從此染黃，成為黃色政客討好腦殘忠粉、博取黑暴勢力歡心嘅舞台。黃色區議員藉故侮辱警方代表嘅低俗戲碼，喺各區區議會輪流上演，而中西區區議會最為出位，喺民主黨鄭麗琼嘅主持之下，竟然夠膽死通過動議，拆卸西區警署，甚至禁止兩位警方代表再出席。

上述鬧劇，早於5月28日上演，喺之前仲有更多，但喺過去幾個月，除咗民政處係咁咦出咗封信，指責中西區區議會越權之外，香港政府毫無作為，作為特區首長嘅林鄭月娥，除咗識得表示遺憾，到底仲識做啲乜？

可能見中西區區議會玩得過癮，九龍城區議會有樣學樣，竟提出刪除鄧炳強到訪嘅議程，但佢哋似乎忽略咗一樣嘢，一哥就係一哥，帶領警隊止暴制亂時絕不留手，面對黃色政客進逼時也絕不退讓，因為佢係文治武功雙絕嘅鄧炳強，而唔係嗰一位喺暴亂期間坐冷氣房，只識喺鏡頭面前將「眼淚還是留給天撫慰」嘅林鄭月娥！

一哥作為身負正義之人，早前喺傳媒面前一番豪言壯語，句句理直氣壯，成功震懾一眾黃色政客，除咗揭穿九龍城區議會懼怕警察正義嘅真相，中西區區議會主席鄭麗琼喺第二日開會時，已唔敢再提禁止警方代表出席之事。今次事件亦令香港人更加清楚明白，就算我哋有一個庸碌無能嘅特區政府，但只要有鄧炳強喺度，香港警隊永遠都係Best of the Best!

原圖：香港政策研究所香港願景計劃Youtube截圖、點新聞片段截圖