美國總統特朗普與夫人梅拉妮亞確診染疫，筆者並沒有幸災樂禍，之不過，筆者希望特朗普嘅競爭對手拜登千祈唔好瀨嘢！講真，依家連個天都幫埋拜登，而距離正式大選都係三十日左右，賽事已經進入大直路，係關鍵時刻！

抗疫不力經濟受挫

萬眾矚目嘅大選首場辯論，民調顯示拜登多佔上風。事實上，特朗普抗疫漫不經心，表現差勁！阿哥，堂堂一個超級經濟、軍事強國，搞到近七百五十萬人染疫，數字仍在增加中，而死亡人數逾二十一萬，全球第一！呢個疫情，對美國未來經濟肯定打擊極大，數以千萬計美國人恐怕要靠失業救濟金生活！侵侵嘅「令美國再次強大」，真不知從何說起？

嗱！任侵侵如何大言炎炎，死不認抗疫不力，於辯論中如何玩把戲，抗疫工作嘅嚴重失誤，而把責任全甩給中國，特朗普都難以自圓其說！

任內負面新聞不斷

撇開特朗普染疫呢單嘢，單講侵侵任內，負面新聞不斷，最近美國媒體又指他二十年來，只在出任總統那年交過入息稅，作為總統，竟然長期避稅，完全冇盡公民責任！特朗普擺出「為美國的偉大」而競選總統，只象徵性收一美元薪水。之不過，佢嘆慣富豪生活，在位三年多，有人幫佢計過數，單係高爾夫球之旅，狂花公帑一點三三八億美元！這真是天文數字！以美國總統年薪約四十萬美元，佢花費係打高爾夫球嘅錢，足以支付三百三十四年嘅年薪！所謂「象徵性一美元薪水」，原來是咁的！

特朗普從任何角度看，都不是個稱職嘅總統，在位三年多，最矚目的就係「退群」，完全沒有大國嘅風範，言而無信，如何領導世界？其次，用人唯親，將不聽其言嘅精英全部炒魷，根本未能「慎取左右」，你話真正人才或稍有自尊心嘅精英，會投靠在其旗下工作嗎？佢一味叫囂令美國再次偉大，然而，靠大聲有用嗎？靠廢噏冇謂可成事嗎？不要忘記，侵侵在任三年多，美國國債由二十萬億美元上升至二十五萬億美元，估計佢如未能連任，下年一月離任時國債料達二十八萬億美元！

稍有良知都唔揀佢

美國選民如果稍有一點良知和判斷力，揀隻貓揀隻狗，都肯定唔會揀佢！之不過，選民又多是盲頭烏蠅，揀總統，亦不過揀個「熟悉嘅魔鬼」而已！如果繼續支持佢，唔單止揀個「熟悉嘅魔鬼」，直頭抱住個幾千噸嘅計時炸彈！

或者我哋都係「老鴉笑豬黑，自己唔覺得」，咁多年來，都有人選反對派議員，遂使香港立法會變垃圾會，議會空轉，一味攬炒搞到香港雞毛鴨血！

今二十一個泛民主派留任，立法會整體格局不變，唯一可預知嘅係抗爭升級，鬧劇不斷！立法會主席梁君彥希望留任嘅反對派議員回歸初心，專注經濟、民生等議題，那是痴人說夢！筆者倒寄望未來真正投票選議員時，選民真係慎選議員，投下手中真正神聖一票，而唔係選啲一味叫囂要攬炒令香港萬劫不復嘅所謂「尊貴議員」！

原圖：無綫新聞截圖