警方修訂《警察通例》中嘅「傳媒代表」定義，記協同攝記協嘅會員證，依家除咗係會員證，什麼也不是。本來「大權在握」，卻忽然「降格」成為「黃背心俱樂部」，有人會激到扎扎跳兼大叫「打壓新聞自由」亦係意料中事，大家應酬一下意思意思就得，毋須太過上心。

更何況，依家警方只不過係將記協之流排除在外，已登記嘅傳媒機構記者，同埋外國知名媒體，一樣可以如常採訪，呢個做法同好多市民所期待嘅「記者發牌制度」，仍然相距甚遠，你想採訪咪去政府新聞處登記囉，依家又唔係唔畀你登記，有乜好嘈？話分兩頭，黃色陣營過去多次叫囂，話如果政府以「記者發牌制度」去監管傳媒，無異於「打壓新聞自由」云云，但既認為政府唔可以咁做，何以見得記協就有呢個資格去做？

「黃背心」喺暴亂現場有幾咁阻埞，相信唔使我多講，大家平時睇新聞見唔少。一道又一道嘅「黃色風景線」，就攔咗喺警察同暴徒之間，當然佢哋嘅鏡頭永遠只會對準一個方向！一旦執法者採取驅散或拘捕行動，呢道「黃色風景線」仍然雷打不動，畀人掂一掂就插水，起哄高呼「打壓新聞自由」，類似嘅戲碼一再上演，市民真係睇到厭，「新聞自由」四隻字因為「黃背心」而變得極為廉價，咁你話警方唔拉封鎖線攔住班搞事友點得？

我有我執法，你有你採訪，本身大家河水不犯井水，你好我又好，偏偏有人玩串個party，講到尾，演變到今時今日咁嘅局面，完全係班「黃背心」自己攞嚟！相信今次警方修例只係第一步，港府以後必須要有發牌制度去監管記者，不過無論係幾時做、點樣做都好，一定輪唔到記協去做囉！

原圖：港台新聞資料圖片