執筆之時，「普及社區檢測計劃」仲有幾日就結束，目前已經成功搵出超過20名隱形患者。不出所料，黃色醫護工會「醫管局員工陣線」又有說話講，質疑政府亂用抗疫資源，未有善用公帑云云。

以香港大約750萬人口嚟講，參與普檢嘅人連200萬都冇，確實不如理想，但呢個到底係邊個嘅責任？政府固然係做得唔夠好，但嗰班一日到黑喺度唱衰檢測、散播政治病毒、唯恐天下不亂嘅黃色人形物體，一樣係難辭其咎！

話說回來，20多個隱形患者，話多唔多，話少唔少，話到明係隱形患者，如果放任佢哋喺社區傳播，會唔會20變40，40變80，甚至極端啲講，最終演變成千萬人感染，冇人可以預計得到。到時疫情所帶嚟嘅經濟損失何止千百億，人命損失更唔可以用金錢去衡量！

而最最最令人痛心嘅，莫過於國家援軍受辱，人哋千里迢迢嚟到香港，一心諗住幫手抗疫，卻無奈躺槍，成為黃色政治病毒下嘅犧牲品。早前睇新聞見到支援隊副隊長受訪，佢話團隊嚟到香港聽到第一句說話，就係畀人質疑「你們來能做什麼？」真係良心當狗肺，明月照溝渠！大佬你當人哋係嚟香港玩嘅咩，貪你香港多病毒定係多港獨？呢支團隊入面，好多人都係為咗幫香港而同屋企人一別數月，甚至有人因而推遲婚期，依家仲要受你哋氣？

雖然我相信香港仍然係正常人佔大多數，無奈喺網絡世界，負能量永遠都比正能量強，十個識得感恩嘅人，未必有一個會講出口；但十個狼心狗肺嘅人，就有十個都會亂鬧一餐！國家隊為香港付出咁多，身為有良知嘅香港市民又點可以畀佢哋受委屈？喺呢度懇請咁多位，一人一句向國家援軍致謝，以表心意！

原圖：香港政府新聞網資料圖片、文匯報資料圖片

https://www.news.gov.hk/chi/2020/08/20200802/20200802_204921_308.html

http://paper.wenweipo.com/2020/09/02/HK2009020001.htm