美帝霸權對華動作不斷，近月猶甚，好多人可能都已經聽到麻木咗，所以先嚟簡單疏理一下近年嘅中美紛爭。

2018年3月，美國發動對華貿易戰，多次宣布向中國商品加徵關稅，而中興、華為等中國科技企業先後成為霸權目標，雖然著實令中國受創，但美國自己亦元氣大傷，多間巨企宣布撤出美國，美國大豆擺到爛都冇人要，唔少廠商叫苦連天。

同年12月，華為副董事長孟晚舟於加拿大機場轉機時被捕，幕後推手原來又係美國，至於策劃呢場「綁架案」嘅理由，相信你知我知，特朗普一定知。直至今日，孟女士仍然受困加拿大，成為白宮嘅政治籌碼，歸國無期。

踏入2019年，中美貿易戰仍然持續，兩國關係若即若離，直到香港6月爆發反修例風波，美國即時搶佔道德高地，與香港黃色勢力裡應外合，星條旗喺暴亂現場飛揚嘅場面屢見不鮮，香港淪為國家安全缺口，成為大國博奕嘅舞台之一。

去到2020年，亦係美國大選年，特朗普對中國嘅貿易戰攻勢從未停止，美國國務卿蓬佩奧四出抹黑華為5G，香港嘅社會事件亦一再成為美國借題發揮嘅藉口，而中國喺呢個時候正忙於平息國內新冠肺炎疫情，無暇與美國周旋。約莫三月嘅時候，新冠肺炎於全美爆發，至到現時疫情仍然嚴峻，確診人數至今將近500萬，但特朗普為掩飾自己抗疫無能，竟向中國大潑污水，企圖轉移美國國民視線。

嚟到近呢幾個月，特朗普小動作愈見頻繁，插手南海局勢、捧台灣上位、通過《香港關係法》、驅逐中國駐休斯敦總領事館、封殺騰訊同TikTok、制裁《港區國安法》相關官員……正如我頭先所講，2020年係美國大選年，所以呢一切，似乎都係理所當然。

特朗普理所當然要搞中國，但中國並唔係理所當然要受你氣！中國人被嚇足幾十年，可以話係畀人嚇大嘅，你做初一，我做十五！你敬我一尺，我就敬你一丈！美國口口聲聲制裁制裁制裁，唔通美國喺中國就冇領事館？唔通美官喺香港就冇資產？唔通美企一啲在華投資都冇？定係話…...唔通美國以為中國真係冇可與之一戰嘅軍力？

香港人日常接觸到國歌《義勇軍進行曲》嘅機會可能唔多，但還請大家記得呢一段，「中華民族到了最危險的時候，每個人被迫着發出最後的吼聲」！

原圖：無綫新聞資料圖片