立法會換屆選舉將至，港大法律系副教授戴耀廷策劃所謂「初選」，以決定黃營由邊個出選相關議席，以免喺選舉時出現互相「鎅票」嘅情況。黃營最終目的，就係要喺下屆立法會奪取「35+」席位，一旦成功就會運用權力，否決財政預算案等重大政策，令政府停擺，以逼使特首回應所謂「五大訴求」。

政制及內地事務局局長曾國衞早就講到明，既然「初選」目的係為咗癱瘓政府，咁組織、策劃及參選「初選」等行為，都可能違反《港區國安法》相關條文。《港區國安法》列明，任何人干犯危害國家安全罪行，將會喪失參選資格，律政司司長鄭若驊就解釋，由於條文未有寫明限期，所以可視作終身DQ！

然而，呢股以「民主派」自居，卻早已變成「攬炒派」嘅黃色勢力，喺《港區國安法》呢把高懸嘅利劍之下，卻仍然明目張膽搞陽謀，戴耀廷更大言不慚，話要多謝曾國衞為「初選」宣傳，到底係乜嘢原因，令呢班友有恃無恐？

《港區國安法》實施已有大半個月，但黎智英、李柱銘、戴耀廷之流繼續逍遙自在，班黃色政客一個叫得比一個大聲。講到尾，就算有再鋒利嘅劍，特區政府若懸而不用，《港區國安法》終究是一紙空文！

國家為立法保護香港，不惜與歐美列強撕破臉皮，付出已經太多太多，特區政府絕對唔可以繼續畏首畏尾，唯有下定決心，將亂港份子一網打盡，守好國家南大門，與祖國共抗外侮，先至係唯一出路！

原圖：無綫新聞截圖