市民等到頸都長，「港版國安法」細節終於喺今日曝光，一如所料，全程交特區政府主導，由執法到審判都係香港一手包辦，免得落黃友口實，又要出嚟大叫「一國兩制」已死啦。

之不過，如果只係靠特區政府就搞得掂，黑暴之禍又豈會持續一年之久？好彩中央仲埋下一重保險線，就係喺香港設置「維護國家安全公署」，公署一般而言唔會出手，但喺特定情況下，公署仍可行使管轄權，有中央為香港把關，港獨漢奸想甩身都難！

法例由香港警察執行，審判法官須由特首指定，看似十分完美，但美中不足嘅係，今日所公布細節，似乎冇提過一旦罪成，犯國安法者應在何處受刑？有人話，喺香港犯法，梗係喺香港坐監啦！但既牽涉國家安全，呢班危害國家嘅重犯，又是否合適在香港關押呢？幾乎已經可以預見，邵家臻、黃之鋒之流大打「囚權牌」，政府到時又有排頭痕喇！

反修例暴亂由黑暴份子「反送中」而起，直接間接促成今日嘅「港版國安法」，如果將呢班「大功臣」統統「送中」處置，豈不妙哉？

原圖：通視影片截圖、無綫新聞截圖