官司累累嘅壹傳媒創辦人黎智英早申請更改保釋條件,話想喺保釋期間暫時離開香港去美國咁話喎,不過最終被高院法官李運騰拒絕(請按此重溫)。李官今日頒布書面解釋,原來係驚肥佬黎喺美國「中招」染上新冠肺炎,真係用心良苦啊!
李官嘅書面解釋指,黎智英申請6月24日至7月19日期間離港赴美,行程非常豐富,去完紐約去華盛頓,主要係探親及討論業務;李官指出依家好多商業會議都可以用視像舉行,黎智英唔需要親身到美國,就算真係批准佢離港,返到嚟又要接受14日強制檢疫令,加上黎智英年屆70歲係「高危人士」,萬一喺美國中埋新冠肺炎,影響到審訊進展。
此外,對於控方所指,美國政府已經暫停同香港嘅逃犯引渡協議,李官雖然同意潛在問題不可忽視,但認為未足以成為是次申請嘅重要考慮因素。
「港版國安法」將至,肥佬黎都一把年紀,美國呢啲咁危險嘅地方就唔好去喇,乖乖地等吓啦!
原圖:新華社、無綫新聞截圖
http://www.xinhuanet.com/2020-03/21/c_1125745098.htm
投票已截止,多謝支持