美國總統特朗普管治無能，反警暴怒潮席捲全美！睇怕佢機關算盡想連任，用高壓手法想速速平亂卻適得其反！若然佢處理手法一味硬下去，恐怕很快便會輭下來，不必等到十一月大選，便要灰頭土臉鞠躬下台也！

香港高官國籍備受關注

呢，早前佢仲宣布要撤銷香港特殊待遇和制裁中港官員，自己一身蟻，好心先安內再攘外喇！香港一眾洋奴漢奸，仲聲聲悽厲求救侵侵，睇怕押錯注矣！撇開洋奴漢奸嘅醜態唔講住，侵侵要制裁中港高官，睇怕空有姿勢，不過，香港高官嘅國籍再備受關注。

嗱！翻查特首、三名司長、十三名局長及行會非官守成員當我中，只有新任民政事務局局長徐英偉過往持加拿大護照，於二〇〇八年出任民政事務局局長政治助理時申請放棄加拿大護照。以徐英偉當年嘅職位不一定要放棄外國護照，但上任前主動放棄外國居留權，避免「雙重國籍」引起「雙重標準效忠」嘅質疑，自我「消毒」，大有減壓作用，也證明自己有意長期從政嘅決心，高明！值得其他有意從政者學習。

確保效忠中國和香港

有政界人士及學者認為唔單止主要官員要放棄外國國籍，建議處長、助理處長和常任秘書長等級數嘅官員都應放棄。筆者認為，廉政專員唔可以有雙重國籍，其下嘅首席調查主任、總調查主任亦應放棄，除了因為佢哋享高薪厚祿，放棄外國國籍既避免出現利益衝突，又能確保效忠中國和香港特區！當然，司法部門嘅法官亦然！

一句到尾，即係所有高官不應容許有雙重國籍。

嘞！無論係問責官員或行會成員，佢哋宣誓就職都必須放棄外國國籍，之不過佢啲家人就冇限制，當中最多持有英國國籍，亦有加拿大藉，甚至據報有妻子、女兒已經移民加拿大，呢啲即大陸統稱嘅「裸官」，搵夠就走佬，點講都係唔馨香㗎啦！

阿哥，你盡搵香港錢，屆時「知己一聲拜拜遠離這都市」，說要同一家人享天倫樂。

豈能身在漢營心在曹

高官宣誓效忠《基本法》，又身在漢營心在曹，試問一心二用，能全力為港人服務嗎？

再講啊，公務員申請外國國籍需要向外國宣誓及效忠，正如有議員話齋：政務主任級以上公務員日後較大機會出任主要官員，若升職先知佢擁「美國籍」、「加拿大籍」，試問有乜理由搵個美國佬、加拿大人做香港高官呢？有人譬喻得妙：一手攬住老婆另一手從背後拖住個小三，如此出軌，不是很大問題嗎？

香港高官，若能「質本潔來還潔去」，全家都冇雙重國籍，筆者相信必能更全心全意為香港打拚，一心不二用，香港亦不至於搞到今日亂過亂葬崗嘅田地！

原圖：香港中通社

http://www.hkcna.hk/content/2020/0525/828071.shtml