自去年六月反修例黑暴以來，警方檢獲大枇炸藥燃燒彈，連恐襲用嘅TATP烈性炸藥都有，亦檢獲自動步槍和手槍。警隊一哥話香港已出現近乎「本土恐怖主義」行為，絕對唔係靠嚇！如果任由黑暴升級，香港好快就會變以色列約旦河西岸，遍地炸彈㗎啦！
廢官不作為，中央終於亮劍，全國人代通過一項「建立健全香港特別行政區維護國家安全的法律制度和執行機制決定」議案，即外界俗稱港版國安法。全國政協副主席張慶黎強調中央不會退讓。
綜合多位人大代表及政協委員消息，包括：禁止分裂國家、顛覆中央人民政府、外國勢力干預及恐怖主義行為等。這將會是一條獨立嘅新法例，由全國人大提案並通過後，透過《基本法》附件三在港直接實施。
港區國安法，旨在全力撲滅港獨和反中亂港嘅洋奴漢奸。有人大代表說，條文與二十三條內容不完全一樣，當中罰則「應該會幾辣」。筆者相信港區國安法頒布時，亂臣賊子懼是必然嘅！大家都睇到，反對派一見「國安法」三字即如喪考妣，精神錯亂，係立法會叫囂甚麼「港人反抗」，「香港變新彊，赤柱變秦城」！
有更激嘅甚至話「開玉石俱焚之局、核爆式攬炒」！
阿哥，家陣係反對派政客想政治攬炒，搞死香港！依家中央亮劍，有決心斬魔除妖，正正好係令香港回歸正軌！只有真正止暴制亂，市民生活正常，營商環境理想，歲月靜好，香港才有望再攀高峰，否則任由黑衣暴徒任意破壞公共設施、「修理」睇唔過眼嘅「藍店」、「私了」政見不同人士，咁香港就會一路沉淪下去，永不超生。
美國佬依家自身難保，特朗普抗疫不力，一味想甩鍋中國。美國國務卿蓬佩奧喺唔夠一個月內，最少五次對香港局勢說三道四，毫不修飾言詞批評香港人權自由狀況；特朗普就手指指：若對香港落實國安法，美國將作出強烈反應！
筆者相信毛澤東若然在生，必定嘲笑美國佬連紙老虎也不如！至於日落西山嘅英國，都係得一個末代港督彭定康，再提失效塵封網結嘅《中英聯合聲明》，認為英國應領導同盟以及全球嘅友好國家，向中方促請維護一國兩制，向中國指出在香港落實國安法係「令人髪指」喎！人走茶涼，不在其位而謀其政，不是痴人說夢嗎？美國佬隔洋助拳，吾人看到的，只是徒有姿勢冇實際！
中央主動出手，特區政府避無可避！一眾問責高官再懶政怠政，唔配合中央出擊撥亂反正，咁就唔該下台讓賢，咪阻止地球轉！
原圖：星島日報
投票已截止，多謝支持
返回
