話說二〇一〇年至二〇一一年期間，本港政壇刮起一陣僭建妖風，多名泛民人士相繼被揭發違法改建！當中以打着「本土」旗號嘅議員毛孟靜違法僭建最離譜！

點離譜？又係僭建地下皇宮？霸地建私人泳池？

哦！今次都幾有創意㗎！毛婆將其淺水灣物業嘅一個地面開放式車房，「被人」加建了圍牆，厲害了！霎時間好似魔法咁，有了大門、窗戶，屋外仲有盆栽無數，時有蝴蝶雙飛，好鳥來鳴，變成一間獨立住人嘅雅緻屋，問你服末？

嗱！屋宇署當年接報巡查過該「車房住宅」，確認不符合核准圖則，換句話講，即係涉嫌違反土地用途，甚至涉違反地契條款。之不過，身為「尊貴議員」嘅毛婆，多年來一直死撐，一招太極推手，腰略傾腿稍提如黃狗射尿，就用陰力推畀佢夫君，話當年老公買入該物業時，該處已被改建，關人隱事咩！又辯稱佢哋一直有向政府繳交差餉，果然盡晒本土公民責任，真係感天動地咯！原來有交差餉，就可以車房變獨立住宅，失敬失敬，又學到嘢！可惜筆者只有儲物小室，睇怕變極都係「劏房」！

反對派常有口話人冇口話自己

毛婆仲好委屈咁話，僭建啫，又「唔係殺人放火」！其潛台詞即係唔泊車住人，犯法吖？使唔使咁大驚小怪吖？阿姨，唔係殺人放火，就可以無王管？咁嘅質素都可以做「代議士」？喂，啲藝員出軌偷食又唔係「殺人放火」，一時「抽離唔到角色」都立刻要被放入雪櫃冷藏啦！有啲甚至鼻涕淚水披流滿面要從此退出娛樂圈添！而毛婆身為立法會議員卻知法犯法，其身不正，點樣審議法案？仲死撐唔拆有理！就欠未講話「支持環保」吖嘛！又拆？人哋唔想做大嘥鬼嘛！爭在未揾環境局局長黃錦星頒個「環保先鋒」奬狀畀佢！

其實兩年前都有關注團體到毛婆寓所外抗議，批評佢雙重標準，嚴人寬己，高呼「巫（毛）婆落台」！不過，睇佢依然「尊貴」到底，睬你都儍！

反對派經常有口話人冇口話自己。嚴復早在一百多年前就批評，中國嘅國民性「始於作偽，終於無恥」；如今在反對派身上，依然看到這八個大字！反對派動輒呼喊「法治、民主、自由」，卻原來多是知法犯法的無恥之徒！而所謂「自由」，是可以用「尊貴議員」作威作福嘅「自由」！香港納稅人用這麼多公帑，養一班像毛婆如此厚顏無恥嘅「尊貴」垃圾，你道冤不冤？

原圖：香港電台資料圖片

https://news.rthk.hk/rthk/ch/component/k2/1518476-20200402.htm