連登仔力推「黃色經濟圈」，呼籲同路人抵制「藍店」幫襯「黃店」，仲吹到個圈要幾繁榮有幾繁榮，點知壹傳媒創辦人黎智英4月22日拍片求救，話《蘋果日報》訂閱數由80萬直插至不足60萬喎！肥佬黎今次求救，狠狠打臉嗰班勁吹「黃圈」嘅人，如果「黃色經濟圈」真係得，肥佬黎又使乜急？莫非《蘋果》作為黃營最大喉舌，卻不在「圈」中？

非也！有連登仔隨即號召救《蘋果》，講到明話唔可以畀佢死，黃色網民一呼百應，紛紛「聲稱」會幫手，所以《蘋果》今次告急，好有可能就係「黃色經濟圈」交成績表嘅時候。《蘋果》只差20萬用戶，就可以回復到先前嘅80萬，黃營號稱200萬同路人，只要有10%嘅人肯幫手就得，簡直係濕濕碎啦！

號稱200萬人去晒邊？

結果如何？肥佬黎4月28日再次拍片「衷心感謝」支持者，原來《蘋果》訂閱數只不過回升3萬左右，到底當初號稱高達200萬嘅同路人去晒邊，連月費$58都唔肯畀？去「龍門冰室」、「光榮冰室」呢啲連登仔吹捧「黃到發金」嘅餐廳食個Lunch，分分鐘都唔只呢個數啦！到底係《蘋果》唔夠「黃」，定係「黃色經濟圈」吹大咗？

「黃色經濟圈」威力如何，見到《蘋果》家陣嘅環境，大家心中有數，但話返轉頭，新冠肺炎席捲全球，香港正面臨前所未有嘅困境，到底喺呢個時候，香港人係咪仲要分咩「黃店」、「藍店」，連食餐飯都同政治有關呢？

原圖：HKG報、《蘋果日報》網頁截圖