【世看疫情】唔係同一類人係做唔到朋友、坐唔埋一枱！美國總統特朗普當疫情冇到，力推重啟經濟，仲煽動粉絲反居家令。無獨有偶，擔任特朗普體育、健身及營養顧問嘅心胸外科名醫奧茲（Mehmet Oz）竟表示重新開學係一個誘人嘅選擇，更離譜到指開學只會令死亡率增加2%-3%，值得一試喎。如此言論，網民嬲到爆炸，結果奧茲醫生好快認衰道歉…

奧茲醫生14日於Fox News節目中，被問到美國如何重啟經濟時，竟然話重新開放學校係一個非常誘人嘅選擇，更指就總死亡率而言，「可能只會讓美國的死亡率增加將增加2%到3% 」。佢指雖然每一例死亡都係一條生命嘅損失，但同時認為令每個孩子回到學校，指孩子們可以安全地接受教育，吃飽飯，係最大限度地利用佢哋嘅生活；更指雖然重新開放學校係存在著理論上嘅風險，但仍覺得值得試試云云。

一條人命都係人命

所謂嘅2%-3%嘅死亡率，分分鐘係千萬條人命，奧茲竟然講到無傷大雅咁，令人震驚。此言一出，即惹網民大力抨擊，「炒掉奧茲（#FireDrOz）」嘅話題更快速登上twitter熱搜。而奧茲於17日終於跪低道歉，喺twitter發文話呢個唔係佢本意，佢講錯嘢喎！

一條人命都係人命，點可以用咁輕鬆、兒戲嘅說法話只增加2%-3%死亡率就值得一試？這種人做醫生，你驚唔驚？

原圖：無綫新聞截圖、dr_oz Instagram

https://www.instagram.com/p/B99WIO1JWvc/