聽「周融周圍講」首集，說愛玩嘢搞事嘅馬騮仔郭榮鏗，偏偏遇上港澳辦如來手掌！看來馬騮仔今趟插翼難飛，DQ在望！這首集看得叫人大呼過癮！

有道是「國家將亡，必有妖孽」。看看今日香港時運不濟，昔日嘅「香港速度」已成笑話；立法會更是妖孽為患，反對派一味拉布，只破壞不建設！阿哥，立法會之所以淪為「垃圾會」，豈是無因？古時「清談」誤國，今反對派則「拉布」誤盡蒼生，同樣令人有「今古真兒戲」嘅共鳴。

反對派長期如此拉布玩嘢，再不就是敲枱叫囂擾亂秩序，蹉跎歲月，確實以搞死香港為職志。身不正，言不信，難怪港澳辦及中聯辦都忍不住開聲，不點名批評主持內會主席嘅公民黨議員郭榮鏗和部分反對派議員為謀取政治私利，濫用權力試圖「政治攬炒」，其所作所為令人質疑有違議員宣誓誓言，構成公職人員行為失當。

每年大手筆大花特花

唉！呢班反對派嘅「尊貴議員」議員，平時大言炎炎，對官員呵斥到青筋暴現，好不威風！好似公民黨立法會議員陳淑莊，「叫你stay home喎！點對得住醫護！」自己卻知法犯法，涉違「禁聚令」蒲吧「開會」！呢啲講一套做一套嘅行為，不就是梁任公所指出嘅「用之不得其當，雖善言亦足以誤天下」咯！

有人就話喇，反對派政客平時連一毫子津貼都要賺盡，要他們減薪可能比死更難受。例如每年二百幾萬實報實銷的辦事處營運開支，以及資訊科技設備資助，不吃白不吃，反對派政客每年都大手筆大花特花。就好似公民黨郭家麒便曾被爆上個立法會年度，短短兩個月之內買咗三部同一品牌唔同型號嘅手提電腦，真係離晒大譜。至於教育界代表黃色教協葉建源一樣犀利，唔止買電子產品，雪櫃、空氣清新機都不放過。呢啲咁嘢作為，如果喺日本嘅議員，一早鞠躬下台，有恥感嘅甚至切腹無面見人喇！

節儉慳家理財有道？

嗱！筆者讀前輩大作，讀到幾段上世紀六十年代的舊事，讓人見證了「清廉」二字。例如台北駐聯合國常任代表蔣廷黻於當年轉任駐美大使，一上場就問前任葉公超大使點樣開飯。原來，葉不公超宴客時，就會畀廚房早餐費五元，中晚餐費則各十元。如果宴客，先會用公款開支。蔣廷黻見此照跟。咁都未算，根據周谷嘅《胡適、葉公超使美外交文件手稿》，葉公超駐美時，由於使館莫財，佢就將全部薪資捐出補貼。看官，這不正是古人所說的：「非其道，則一簞食不可受於人；如其道，則舜受堯之天下，不以為泰。」這不就是做人品格嗎？

所謂「不以為泰」中嘅「泰」，就是「過分」嘅意思。反對派議員平時扮晒聖人，卻舔得「泰」盡。筆者相信，如果買卷廁紙都可以Claim錢，佢哋肯定Claim到十足。各位，咁算唔算「節儉慳家，理財有道」？

原圖：星島日報

https://std.stheadline.com/instant/articles/detail/1246279/%E5%8D%B3%E6%99%82-%E9%A6%99%E6%B8%AF-%E5%85%A9%E8%BE%A6%E8%AD%B4%E8%B2%AC%E9%83%AD%E6%A6%AE%E9%8F%97-%E6%B0%91%E4%B8%BB%E6%B4%BE%E8%B3%AA%E7%96%91%E4%B8%AD%E5%A4%AE%E5%B9%B2%E9%A0%90%E7%89%B9%E5%8D%80%E4%BA%8B%E5%8B%99