自己嘅出身係點冇得揀，但係自己嘅未來絕對可以由自己決定！近年紅爆中國內地、被網民譽為「新時代四小花」之一嘅台灣女藝人歐陽娜娜，疑因受到國民黨出身嘅父親歐陽龍近日一番有關「九二共識」同「一國兩制」嘅言論牽連，被貼上「台獨」標籤而遭封殺。為撇清「台獨」嫌疑，歐陽娜娜隨即喺多個社交平台上發表聲明，表明自己永遠以身為中國人而驕傲！

受父親言論牽連遭封殺

據了解，歐陽龍近日以發言人身份轉述國民黨對於「一國兩制」無共識嘅立場，表明「不統不獨不武」，有人就認為相關言論未能堅持「一個中國」原則，並遷怒佢個女歐陽娜娜，有內地雜誌更因為咁而封殺歐陽娜娜，喺雜誌上裁走埋佢張相添。

事件喺網絡上瘋傳，發酵咗幾個鐘後，歐陽娜娜火速喺微博、Facebook等社交平台上發聲明同台獨割席，自言每當有人問佢來自邊度嘅時候，佢都會話到明自己「I come from China （我來自中國）」，永遠會記得自己祖籍係中國江西，「我為我身為中國人驕傲」。

「已成年有獨立意志」

歐陽娜娜所屬工作室表示，歐陽娜娜已年滿18歲，有自己獨立思考同意志，佢已經選擇咗承認自己中國人身份，選擇咗支持一個中國原則。就算歐陽娜娜父親係點都好啦，最緊要係佢自己識諗，你話係咪？

無論出身如何，中國台灣嘅歐陽娜娜就做咗自己嘅選擇喇，唔知中國香港嘅黃獨份子，又幾時先會作出正確嘅選擇呢？

原圖：歐陽娜娜Facebook

https://www.facebook.com/Nanaonly/photos/a.664215870262608/2467012369982940/?type=3&theater