民主黨許智峯想升呢做立法會議員，原本全職區議員年薪連津貼八十三萬元，一跳四倍至三百幾萬，值唔值？你會唔會俾？做立法會議員梗係要睇下品格操守及處理公帑是否合格？許智峯區議員喺呢方面嘅表現如何？睇完大家才決定，是否值得俾佢加薪四倍，做個年入三百幾萬嘅立法會議員？最近民主黨自己查許智峯，因為他自爆將約十二萬公帑津貼當花紅送畀自己友。連民主黨都覺得好有問題(雖然最後都係決定放生)，市民又點睇呢？

捐返十二萬就當冇事？

許智峯自己都知衰㗎，話捐返十二萬畀關愛基金填數，其實佢得三萬一個月收入，大嗱嗱又有冇十幾皮嘔出來？係咪民主黨想保佢，迫不得已或借或送同佢頂呢？補鑊還補鑊，件事就起碼有四個疑團未解答！

第一個謎，許智峯將十二萬平均分畀三名全職同兼職自己友助理，其中一名兼職只係做咗五個月，月薪只係二千元咁大把，竟然收到四萬大元，相當送二十個月人工俾一個做咗五個月的part time，係正常人都睇得出有問題！問題係，點解許志峯慷慨得咁離譜？條友係邊個？有乜景轟？

第二個謎，呢四皮嘢係咪真係畀咗助理？二千元人工做五個月收四萬花紅，係真唔係真？你知啦，民主黨最叻玩左手交右手嘅財技游戲，早年匯標事件大家都見識過，今次究竟會唔會有人枱面收錢，枱底要嘔番出來，入咗落其他人個袋呢？大家要唔要問？民主黨會唔會查？

第三個謎，捐返出來的十二萬係邊個畀？真係許智峯？定係民主黨？究竟為咗乜？補鑊？係咪十二萬唔出，點收番一年三百幾萬返來？民主黨係咪包庇自己人？

第四個謎，公帑冇使晒，就可以坐地分肥？許智峯做咗，冇犯法喎，但品格操守同處理手法係咪合格？民主黨係咪覺得冇問題，仲支持一個咁嘅人出選立法會？

一次不忠 一世不用

順帶一提，現時區議員年薪$364680，另有$468492實報實銷營運津貼。而立法會年薪係$1116480，津貼$2589370，加埋有成三百幾萬，相當於前者四倍幾。一次不忠，一世不用。佢咁嘅表現，你加唔加四倍人工，三百幾萬一年畀許智峯？原圖、片：https://www.facebook.com/178843345631203/photos/a.178876732294531.1073741825.178843345631203/396765347172334/?type=3&theaterhttp://img.taopic.com/uploads/allimg/110604/2239-1106041F23332.jpghttp://www.legco.gov.hk/chinese/education/images/icon3.jpghttps://www.youtube.com/watch?v=lKkFf_a4KXA