看見名導演李力持，總會想起他鏡頭下的笑話，不過今日社會撕裂，忌諱太多，當創意滲進了顏色，當怨氣掩蓋了笑聲，香港人還講得笑嗎？大導演還會繼續搞笑嗎？ 原來，會的。畢竟是喜劇大師，訪問中我們笑聲不絕，一池死水在李力持眼中全化成笑料，其實快樂不在於內容，在心態。

潑水不是潑火 對傻人用怪招

「我好少用拳，我是四兩撥千斤，潑水，不是潑火，搞下笑、潤下人，扮下傻仔。佢傻你做咩同佢癲呢？對付傻人要用怪招，何必太認真！」 所以，李大導慣用嬉笑怒駡剖析世情：「明知打交環境，你仲走過去，唔好意思我嚟搞gag，死開啦你！天大地大做乜一定要留喺度？香港豆腐膶咁大，就算你用google earth zoom 埋去，都要zoom七、八秒先睇到。如果搭飛機，飛上天一分鐘，成個香港，一眼睇晒。你試下返內地，坐喺飛機上，五、六個鐘連綿不絕仲係國境。但你話關我咩事，我係本土派，咁ok囉，佢哋係本—土—派，即係話，永遠唔會離開個竇。」

甩毛飛的「本土大晒」心理

這些躲在地洞的本土派，李大導形容，就像以前拍戲在西貢遇到的甩毛飛，攝製隊明明跟村長講好，這些甩毛飛還是要來搞事收陀地，他們說：「我哋喺度出世，大晒！」這裡出世就大晒，不就是本土心態嗎？ 正因為這種「本土大晒」心理，令他們容納不了新移民、簡體字、普通話。 「我哋做乜要學英文？搵食丫嘛，呢個係森林基本法則、求生技能，人哋用普通話鬧你，你聽得明嗎？我哋返內地最著數就係講廣東話、英文而人哋聽唔明，但佢哋嘅話我哋識聽喎，咁咪食到佢囉！當然，如果你唔打算離開個竇，一世匿喺裏面，咁唔該你噏返正啲廣東話、寫返啱啲繁體字先啦！」

不出山洞不求上進的蒙面賊

不出山洞、不離本土、不求上進的蒙面賊，卻要追尋幸福，李大導給他們一字真言：做啦！ 「我哋由細到大睇電視劇，覺得幸福是咩？有間屋、有女友、有車、有份工，返工又要唔使做，講講是非又一日……呢啲就係我哋一直被灌輸香港人應有嘅幸福，好基本之嘛，梁振英你聽唔聽到呀？不過，真係出到社會，你要攞到電視劇嘅基本生活？做啦！邊有咁易丫！」 「好多人只想伸手要幸福，呢個弱勢政府，真係得架，由董建華已經開始練到耳仔軟，叫吓就有架喇，仲要keep住叫，同埋keep住有一大堆人一齊叫。不過，我哋呢班戇居60後，就習慣自己有手有腳搵幸福。正如唐三藏遇到驚濤駭浪時問佛祖點算，佛祖話：『你行啦，行就有路架喇！』路，本來就係人行出嚟。」

生於亂世？可有畫面配合？

「你話國家對你做過咩？梁振英對你做過咩？我可能睇得開啲，我只係多謝佢哋俾本特區護照我，令我可以呢度去嗰度去。如果你喺機場問我係咩人，我會答：我係快樂地球人！」 「我非常羨慕嗰啲喺廣西落腳嘅老外，你點解會離開家園，嚟到呢個共產黨管治嘅地方？佢哋話，因為喺呢度搵到快樂喎！有冇搞錯，冇可能，共產黨喎？但又真架喎，只要你攞張回鄉咭返內地睇睇，又唔覺得四處愁雲慘霧吖。」 「你話生於亂世？呢個形容詞真係唔可以亂用，要有畫面配合先得架！至於民不聊生，我只係喺旺角地鐵出口見過一個老外，趴喺地下乞食囉。」

快樂的怪人 傻村長的天堂

「在內地我碰過好多快樂嘅怪人，譬如有個村長，五年前政府收地賠左200萬，佢就喺肇慶郊野買左塊地，開一個人工湖，種左個樹林，當時個個話佢黐線。冇幾耐，樹林引來三萬隻候鳥，村長再種啲貢梨，喺樹林旁邊開間茶室，於是好多攝影發燒友嚟食梨觀雀……一個被共產黨壓榨嘅地方，竟然有個傻村長開墾左一個天堂，你話奇唔奇？」 所以，李力持說，只要肯離開山洞，幸福，還是會找到的。「但如果你不斷戴著那垃圾眼鏡，你看什麼都會繼續是一堆垃圾。」 地洞人，明白未？ 撰文：屈穎妍 圖、片：HKG報 同場推介：G線時事Show零集，按此click入去睇過~~ http://hkgpao.com/2016/03/hkgtv-zero/

投票已截止，多謝支持