最近繁體字與簡體字嘅爭議鬧得沸沸揚揚，繼早前教育局有意將簡體字列入課程，令反中仇共人士不滿外，連無綫電視都受牽連，由今個月22號起，TVB推出全新數碼頻道，將高清翡翠台更新為J5台，並播出普通話新聞配以簡體字字幕，此舉立即引嚟打着本土旗號嘅政黨及人士進行連串抗議行動，其中新民主同盟及部分公民黨成員到將軍澳電視廣播城請願，批評TVB濫用大台地位，清洗香港本土文化，並非以香港觀眾利益為先云云，筆者個人認為簡體字完全冇問題，唔好話大陸，喺香港都有好多人寫簡體字，筆者有時都會寫簡體字，方便又快捷，反對派政客根本就係借題發揮，連簡體字咁芝麻綠豆嘅小事都攞出嚟批鬥，反中反到走火入魔，香港嘅病情實在太嚴重！

反中反到走火入魔

香港係國際城市，而TVB作為香港最大嘅電視媒體，為照顧各方觀眾唔同嘅選擇及需要，推出不同嘅語言頻道實屬正常，點解推出普通話節目再配以簡體字字幕就咁大反應呢？TVB又如何清洗本土文化呢？恕筆者愚昧，我完全睇唔到，香港中西薈萃，除咗英語，普通話亦係重要語言，簡體字更加係常用嘅文字之一，筆者記得在求學時期，先父在成績表或在學校通告回條簽名時亦係寫簡體字，當時學校並冇過問，時至今日，智能手機通訊程式大行其道，其中熱門通訊程式微信及微博嘅內容大部分都係簡體字，咁又有乜問題呢？呢班反中仇共嘅人既然咁憎大陸，點解仲要喺微信同微博開戶口呢？幾乎全部都係簡體字喎，又係大陸出品，點解要用呢？仲唔即刻取消佢？仲有，外購劇嘅字幕同機頂盒上面嘅字都係簡體字，仲繼續用？掉咗佢啦！你哋捍衛嘅廣東話嘅「廣東」都係大陸嘅，有本事就唔好講，轉講英文啦！尖沙咀有條廣東道同北京道，都同大陸有關，唔好行呀，香港係中國嘅領土，香港嘅空氣都有大陸成分，唔好呼吸吖！笨！ 唔好咁無聊啦，為咗反大陸，連簡體字都要批鬥，實在係小學雞行為，令人啞然失笑，筆者唔鍾意英、美同日本三個國家，唔通傳媒播放英語同日文節目，基於仇恨，筆者又要去抗議？每一件事都要分開，仇視中華文化係個人自由，係冇問題嘅，但TVB作為傳媒，亦有佢哋嘅做法同自由，筆者想請問呢班人，你哋憑乜嘢限制傳媒採納文字呢？以為自己係皇帝？稍為不合意就以文攻武嚇方式令對方收聲，真係比希特拉更專制獨裁！ 香港回歸祖國以來，反對派對任何有關中港兩地融合之事大加反對甚至阻撓，高鐵及港珠澳大橋因反對派拉布引致超支延誤，甚至可能爛尾收場不在話下，今次連簡體字都唔放過，可見呢班人為反而反，已經走火入魔，總之有關大陸嘅嘢，唔理啱與錯，反咗先講，日日如是，香港真係愈嚟愈反智、偏激，容不下異見者，猶如身患癌症，再不動手術根治十九年嘅病患，距離滅亡之日不遠矣！ 作者：嘉偉 圖：新民主同盟facebook https://www.facebook.com/NeoDemocrats/?fref=ts

投票已截止，多謝支持