2016台灣總統大選及立委選舉結果揭曉，出現第三度政黨輪替，民進黨實現全面執政，主席蔡英文及其副手陳建仁以689萬票當選台灣第14任正副總統，大勝主要對手國民黨朱立倫300多萬票，順利入主總統府，而立委選舉113席當中，民進黨取得68席，奪得過半數議席，成功控制立法院，國民黨可以話係雙失，不單止失去政權，連立法院控制權都冇埋，淪為極少數派系，國民黨正副主席朱立倫及郝龍斌為選舉失利謝罪下台，今次選舉結果顯示台灣同胞對國民黨8年執政成績不滿，轉而支持蔡英文，民進黨再度上台執政，其台獨主張及不承認九二共識，將為兩岸關係及台海和平蒙上陰影！

國民黨淪為極少數派

今屆台灣大選結果可以話勝負早分，賽前多次民調已顯示蔡英文大幅領先兩位對手，就算後來國民黨換上朱立倫出戰，仍然無法反敗為勝，筆者認為國民黨大敗嘅根本原因除咗犯上陣前易帥嘅兵家大忌外，最關鍵原因在於馬英九政府執政8年提升台灣經濟不力，民眾生活困苦，又對島內台獨勢力莫奈其何，令台獨勢力不斷坐大，太陽花學運已為馬英九政府管治響起警號，前年年底九合一選舉大敗已為國民黨下台敲起喪鐘，民心思變，黨內少壯派要求改革之聲不絕於耳，加劇內訌，致使在總統提名期初期冇人願意為黨征戰，直至洪秀柱挺身而出代黨出征，才穩住局面，後來黨內元老見洪秀柱選情不利，便徵召主席朱立倫代表國民黨出戰總統選舉，本來朱立倫出戰係理所當然，可惜當初在黨內初選時不敢挺身而出，最後被黨徵召才出戰，已經盡失民心，國民黨今次大敗，唔係因為民進黨喺呢四年有乜亮麗成績，而係國民黨自己唔爭氣，敗在自己手上，可以話咎由自取！

上陣前易帥乃兵家大忌

民進黨再度上台執政，兩岸關係再起波瀾已無可避免，其台獨主張及不承認九二共識將成台海和平發展最大障礙，國台辦一再表示，九二共識係兩岸關係和平發展重要基礎，没有九二共識，兩岸關係將會地動山搖，大陸堅決反對台獨，大陸及台灣同屬一個中國，絕不容許台獨勢力搞「兩個中國」、「一中一台」等分裂中國領土嘅行為，當然，大陸方面亦有釋出善意，表示不論台灣由誰執政，大陸對台大政方針亦不會變，大陸願意與承認九二共識嘅政黨或團體溝通及協商，共同繼續推動兩岸關係和平發展，維護台海穩定，同時亦向民進黨放話，表示民進黨必須對九二共識給予明確表態或答案，蔡英文上台後不能再迴避對九二共識及兩岸關係嘅態度，如果蔡英文上台後堅持走台獨路線，必將付出沉重代價，但筆者相信，蔡英文上台後暫時不敢有大動作，因為台灣同胞嘅最大願望係生活安定，經濟有好轉，並不是要求獨立，蔡英文必定先安撫人心，待企穩陣腳後再作定奪，但大陸不能掉以輕心，要時刻提防蔡英文搞小動作分化兩岸關係，進行暗獨！

民進黨上台添不明因素

民進黨黨綱雖然主張台獨，但筆者認為背後嘅美國主子絕不讓台灣獨立，因為一旦蔡英文宣布台灣獨立，大陸便有武力統一台灣嘅法理依據，兩岸統一，令中國國力大振，對美國來說係噩夢，所以最不想台灣獨立係美國！

總的來說，民進黨再度上台執政對兩岸統一可以話危中有機，民進黨嘅台獨主張對兩岸關係固定增添不明朗因素，但只要蔡英文宣布台灣獨立，大陸武力統一台灣就名正言順，所以民進黨再度上台執政並非壞事，筆者當然不希望睇到兩岸兄弟鬩牆，兵戎相見，但如果民進黨冥頑不靈，堅決搞台獨，武力統一將無可避免，大陸已經完全主導話語權，台灣未來如何走，端看台灣同胞如何選擇！

作者：嘉偉

圖：有線新聞截圖