日光係一個充滿歐陸感覺既地方，所以連個地鐵站都靚過人。從日光江戶村搭免費穿梭巴士過黎，一落車就係JR日光站喇。呢個站得一條線，就係JR日光線，目的地係宇都宮，車程約43分鐘。從上圖可以見到，大約一小時一班車。未夠鐘上車住，行下日光市先啦。 從JR日光站行過少少，就會去到上圖既東武日光站喇，而東武日光站既門口就係巴士總站，大家可以喺呢度搭巴士去你所住既溫泉酒店。其實日光仲有東照宮、二荒山神社同輪王寺既景點，不過行程所限，我當日要即刻搭JR日光線去宇都宮食餃子（上兩個星期介紹過架喇，大家可以去HKG報生活版重溫番）。如果大家想玩盡日光同鬼怒川既話，起碼要兩日一夜先夠。 上左JR日光線，大家可以睇到呢個路線圖，就可以知道日光海拔有幾高，去到宇都宮時有幾低。不過當然，搭緊火車時係唔覺的。最後提一提大家，由於JR日光線係一條鄉郊線，所以到站時車門係不會自動開啟的。要落車既話，要自己按制開關門。 車門有指示話比你知架喇。第一次搭，感覺好得意，又好大鄉理。睇住人地開車先識上車。 一連三個星期介紹左宇都宮、鬼怒川同埋日光。大家應該都會被佢地既特式吸引，但係今年九月，一場大雨，搞到呢度變左做澤國，十萬居民要撤離。 呢場水災，發生喺筆者離開左枥木縣之後既第三日。大家睇過我呢幾個星期既介紹，都會記得我去到邊都橫風橫雨，點知返左東京之後，就睇到枥木縣水災呢單新聞。喺酒店既新聞度日loop夜loop，有一件事我好想借呢篇文章同大家講既，呢件事連香港既新聞都無講到的。

先想別人 後諗自己

大家睇完相都知全個日光鬼怒川地區既樓都係兩三層高，所以水災一到，救災直昇機想搵個地方降落都無。呢個時候有個大型商場，肯開放佢地既天台比直昇機降落，而商場既內部就變左臨時收容中心。大家試想下，一個商場變成無掩雞籠，居民、救援人員同記者全部都喺呢個商場入面自出自入。莫講驚唔驚比人偷野，事後清潔都有排你洗。但係日本人就係一個咁既民族，先為別人著想後諗自己。同香港呢種華人社會既人不為己天誅地滅係一個完全既相反。 下星期我地會返番去東京市輕鬆下，行下街食下High Tea。下星期HKG報見。 圖：由作者提供，水災相片轉載自日本電視新聞截圖。

投票已截止，多謝支持