浸會大學遴選新校長，原本上星期四舉辦三場諮詢會後，就會公布錢大康做校長。但學生會有一批學生唔滿意「諮詢不足」，除咗喺諮詢會大聲質問錢大康外，又硬闖校董會遴選面見小組嘅閉門會議，搞到校方要押後任命，兼另行安排錢大康出席學生諮詢會。 講得出、做得到嘅校方，由今日起至星期四加開三場諮詢會，錢大康今日亦履行承諾出席諮詢會，但佢仍然遭到學生示威。究竟點解呢？ 學生會會長陳思豪話喎，加開嘅第一場諮詢會今朝9點舉行，但校方尋晚先至通知，所以得好少同學出席。另外，每場諮詢會得60至90分鐘，又限定每人只可以問兩條問題，好唔夠喉，仲話錢大康過份自信，相信自己做到校長。最後仲補多句，佢哋會視乎來緊兩日諮詢會嘅情況，再決定下一步行動咁話。 隻抽俠都見得惡人多，但講到呢到，真係覺得呢位陳同學又惡又滑稽，然後想問佢三個問題： 一、學生諮詢會開完三場又三場，依然「唔夠喉」，究竟你哋要開幾多場先夠呢？ 二、錢大康自信都唔啱，莫非你想要個無自信嘅人做校長？方便你哋騎劫，被學生會控制嗎？ 三、再講少人出席諮詢會，真係關幾時通知事？更大可能性係大部份浸大學生都唔支持你哋，只得你幾丁友喺到博出鏡呢？ 講到底，今次浸大校長遴選事件搞到滿城風雨，實際只得一小撮激進學生搞事。陳同學，收手啦，唔好再浪費時間，新校長仲有好多嘢做㗎！ 圖：網上截圖