相信唔少人都有畀學校老師追功課嘅經驗，但你又有冇諗過，阿Sir或者Miss為咗收功課可以去到幾盡？瑞典一名大學女教授，眼見論文限期將至，而佢一名學生卻受困伊拉克，畀恐怖組織伊斯蘭國(ISIS)嘅武裝份子包圍，呢位女教授竟然直接請咗一班全副武裝嘅傭兵，殺入ISIS戰區救人，就係要佢交功課……

被武裝份子包圍

據《霍士新聞》報道，其實呢件事發生喺2014年，直到近日先至公開。瑞典隆德大學(Lund University)教授夏洛塔·特納(Charlotta Turner)有一日收到學生菲拉斯·加瑪哈(Firas Jumaah)嘅短信，指自己已經畀ISIS武裝份子包圍，仲有炮彈喺頭頂飛過，好得人驚！

女教授夏洛塔後來表示，當時自己嬲到震，因為如果學生菲拉斯唔可以喺限期前完成論文，將會完全打亂佢嘅研究計劃。夏洛塔即刻安排救援行動，搵咗四名全副武裝嘅僱傭兵，開住改裝過嘅戰車殺入戰區，終於成功喺一星期之內救出菲拉斯。

終如期完成論文

最終，菲拉斯亦如期完成佢嘅論文，而喺四年後嘅今日，佢亦都成功完成博士學位，並還清是次救援嘅費用。

所以，仲讀緊書嘅你，交咗功課未……

原圖：網絡影片截圖、網絡素材