今日再搭多一個站，去到凱旋站。為既就係高雄一個比較新派、岩年青人去既商場　－　統一夢時代購物中心（夢時代）。 夢時代其實係一個超大型既商場，就好似新城市廣場咁大，除左商場之外，旁邊連住統一阪急百貨店。而夢時代同台北既美麗華商場基本上係完全一樣。設計一樣，建築物外型一樣，所以一樣有個大摩天輪。 寫到呢度，請容許我講個感想。好多網友搵我編台北行程既時候，都一定會問點去美麗華商場，有啲人想購物，有啲人想上摩天輪睇下台北全景。但係每次有人問我高雄景點既時候，我一講夢時代，啲人就話去台灣做乜要行商場？又或者去旅行玩乜野摩天輪丫。其實我一直都唔明，唔通去台北同去高雄係兩種人黎？我地參觀下個商場先： 夢時代除左大之外，其實真係應有盡有。地下有一間香港單車迷必去既單車鋪　－　單車喜客。另外，呢度又開左間誠品書店，仲有DAISO大創百貨，即係十蚊店。 講完購物，講下有咩野玩，我唔肯定依傢仲有冇呢個搖控車場，如果有既話呢，搖控車係可以即場租的，幾十蚊玩十幾分鐘咁啦。然後頂樓有個叫Happy 100既空中主題樂園，有小型海盜船玩，仲有旋轉木馬。當然最出名既一定係大摩天輪啦。 食肆方面，想平既話，地下有個大Food Court，筆者早幾集之前介紹過既高雄空廚呢度都有的。 去夢時代既方法好簡單，搭捷運去到凱旋站出口１出，就有免費穿梭巴士直達夢時代門口，車程幾分鐘咋！（http://www.dream-mall.com.tw/） 下星期開始，我地會去到高雄篇既最後一個地區　－　鹽埕區，鹽埕區有鹽埕埔、西子灣同埋旗津三大旅遊景點。唔好錯過最後既高雄篇呀！ 圖：由作者提供