今集嚟到中央公園站，中央公園站其實有兩大景點。一個顧名思義係中央公園啦， 入面有一個叫做城市光廊的地方，如果你夜晚嚟到的話，就會影到高雄市為大家製作既光影藝術，但當然，我用傻瓜相機就影唔到了。下次嚟到而又喜歡影相的話，記得帶部單反嚟影喇！ 第二個景點就係女士們最愛去的 新堀江商圈 喇！呢個商圈有啲似香港旺角女人街，有好多靚衫靚鞋買，同上次介紹高雄車站附近嗰兩個商圈唔同，呢度賣嘢young好多！！ 中央公園站 出口２一出就係，唔明就睇埋下面既地圖 由中央公園站出嚟，左轉入麥當勞方向，你就會見到其實新堀江商圈係由原宿玉竹商圈同新堀江商圈兩個商圈組成的。總之你是但揀一邊行入去之後，橫橫直直行晒佢就啱架喇，我估一般女士要行兩個鐘左右啦，男朋友去麥當勞坐吧。而當時我就去左中央公園度租單車，一路踩到去西子灣。（下一兩期會介紹架喇） 呢度開門時間大約係下午二時左右，太早嚟只會摸門釘。以前嚟呢度既女士們多數都會去Etude House掃貨，不過依家香港都有分店喇，吸引力又會細咗啲喇。但係高雄，除左夜市之外，都無乜行街好去處。有時間點都會過嚟行下啦！ 下星期日，帶大家搭下船同遊愛河，條河真係叫愛河！就喺高雄國賓大飯店旁邊。下星期見。 圖：由作者提供 地圖：高雄捷運網： https://www.krtco.com.tw/train_info/service-1.aspx