高雄篇第一篇文，介紹個集遊樂場、酒店、商場同表演場地既地方比大家，就係義大世界喇。 先講下點去義大世界先，大家可以搭高鐵（從台北至台南之間出發的話）或者搭高雄捷運（高雄市內出發）黎到左營站。又或者搭台鐵到新左營站落車，跟住你就會見到下圖既彩虹市集。 喺彩虹市集出面，你就會見到公車站架喇。公車編號係8501，班次約為20 - 40分鐘一班，車程約20分鐘，車資為新台幣37元。部分班次會以佛光山為總站，不過唔怕，佢都會經義大世界的，唔放心的話，上車問一問司機就可以，反正你都要佢提你落車架啦。星期六日班次會密少少，不過最穩陣就梗係睇定個時間表黎上車啦。本文最後會有網址俾大家。 到左義大世界，呢度會分兩個落車站，一個係皇冠飯店，一個係義大遊樂世界。其實兩個站相隔唔遠，行都行到。不過，如果你拎住行李既話，就梗係返酒店先啦。我無行李，所以我地先去義大遊樂世界。 一落車，你對面就會見到呢座義大皇家劇院。呢個係遊樂場既一部分，不過要另外俾錢的。而樂園入口喺商場入面，我地一齊行喇‧‧‧‧‧‧ 沿途仲有手信買，不過，梗係玩完先買啦。 終於黎到入口，好似去左冒險樂園咁，不過你無去錯。行埋去買飛，之後就入得場。 入場了，筆者去時買成人票係送埋義大摩天輪一次的。依家唔知有冇送了： 成人票價：新台幣899 元，營業時間：週一至日：09:30 ~ 17:30 ，暑假時間: 27/6/2015至 30/8/2015：09:00 ~ 19:30。 連埋劇場，呢個遊樂場共分5個園區（好細架咋！），分別係大衛城、聖托里尼山城、特洛伊城堡同摩天輪。不過其實摩天輪既位置係喺商場既頂樓，要離開左遊樂場，穿過商場行到尾先到，所以其實只得三個園區可以玩。 首先，當你入到園區，第一個就係大衛城。呢度有4D立體影館同單軌火車（來往特洛伊城堡），另外最刺激既就要出室外了，叫「天旋地轉」！ 呢個天旋地轉，唔知大家當年有冇好似筆者一樣，喺添馬嘉年華既時候排餐死都要玩喇。呢個遊戲，你要坐起一張雙腳離地既座位度，好似洗衣機咁，360度不停咁轉轉轉。若玩過就唔使我多作介紹喇，若未玩過就自己試下啦，超好玩，不過勁多人排隊。 跟住旁邊既就係聖托里尼山城，呢度基本上係一啲飲食同賣記念品店鋪。室外有跳樓機，室內係一個遊戲機中心。 再往前行你就會見到呢隻大馬！之後就到機動遊戲既集中地特洛伊城堡。呢度有碰碰車、海盜船、鬼屋同埋過山車，仲有模擬飛行既飛越台灣，總之好玩！！ 玩完義大遊樂世界之後，就返到商場喇，呢個商場好大，應該有沙田新城市廣場咁大。由於呢度係酒店遊樂園區範圍，所以店鋪以名牌為主，香港有呢度都有，不過個商場既裝修就‧‧‧‧‧‧都唔明點解同澳門呀、日本台場呀一模一樣呢？ 好喇，商場都行埋，咁就可以上頂樓既摩天輪喇。呢度可以一眼睇晒全個高雄市，當然仲可以睇晒成個義大世界啦，去相！！ 義大世界網站及公車時間表：http://www.edathemepark.com.tw/Website/info_Route_Transport.aspx 下個星期日，筆者會帶大家去行下高雄既夜市。星期日見！ 圖：作者提供，部分相片轉載自義大世界網站 http://www.edathemepark.com.tw/Website/index.aspx