香港眾志第二屆常委選舉完咗，本來就唔係乜嘢新聞，不過呢班後生仔成日話民主，但睇完他們的改選就知他們完全唔民主，因為連點樣選都無講，只是公佈我選咗啦就算！ 入咗立法會的羅冠聰自然連任主席，而「河童」黃之鋒本人秘書長個位亦有驚無險連任，無人可以撼動，其他位就換咗唔少人。搞笑的是，傳媒問他們有乜候選人？點樣選？羅冠聰就話已經選完不想再提。羅冠聰又冇錯喎﹗只有廿幾個黨員圍威喂決定就得，有乜好講呀？

幾乎將眾志變成「鋒志」

點解要提呢單嘢？其實老宣睇吓睇吓，真係有啲懷疑香港眾志由河童話晒事，想點就點，幾乎將「眾志」變成「鋒志」。講真，黃之鋒秘書長之位唔係最大，但實際上佢幾乎等於話事人，何況之前河童係學民思潮的一哥，香港眾志有一堆學民仔，可以說好多人都係佢嘅前手下，邊個唔聽話，就唔受你玩﹗ 好似早前特首選舉，前學民思潮成員李俊霖在林太的慶功宴上出現。有傳媒就問黃之鋒，河童指李俊霖喺2013年已被學民思潮開除會籍，仲話對李俊霖投向建制陣營感非常失望，質疑李是否對得住過去相信的信念喎。講真，李俊霖脫離咗學民思潮，人哋做乜都關你事？ 另一個例子就係黎汶洛做唔成副主席。先唔提黎汶洛舊年2月立法會新界東補選公開支持楊岳橋，但學民思潮發聲明話唔會支持任何候選人單嘢，就講近啲嘅立法會選舉，黎汶洛話晒都同河童落雨擔傘，河童治下嘅眾志竟然公開話唔夠錢，要集中支持香港島的羅冠聰喎。睇住眾志籌旗咁疊水，卻喺到話莫財冇錢選舉，黎汶洛自己都知乜嘢事啦，心淡之餘，自然同眾志漸行漸遠。去到呢個地步，試問黃之鋒又點會想黎汶洛做副主席呢？

逼迫黨友送自己入立會

點解老宣會講黃之鋒就是香港眾志的「民主」？顯而易見，河童就係因為唔夠秤無得參加立法會選舉，先至肯幫羅冠聰。眼見羅冠聰巧威威成為立法會議員，河童又點會咁於平淡？因此，河童過去一年四圍去，去完美國朝聖，又到英國見末代港督肥彭，仲不停接受外國傳媒訪問，幾乎成為「香港民主」的代言人，國際知名度早已經蓋過羅冠聰。 大家睇返河童在個人Facebook的發帖點講就自無話錯佢。河童話，「『學民思潮召集人』已成為歷史的一部份，但即使我並非團隊裡站在浪尖頂端的領頭人，其實能夠企後一步，跟戰友們為著我們相信的價值，把領袖送進議會，感覺還是很不錯。」一句到尾，至緊要將領袖送入議會，上次係羅冠聰，下次咪到河童本人囉。 現在香港冇乜位畀佢講嘢，河童就想辦法走去台灣同太陽花學運串連，事關民進黨利用太陽花成功執政，太陽花自然無事，他去台灣更加被奉為上賓。不過，明眼人都知，河童只係為自己增加政治本錢，準備下屆立法會選舉，自己請纓上陣也！ 原圖：大公報、羅冠聰Facebook http://www.takungpao.com.hk/hongkong/text/2016/0720/10240.html https://www.facebook.com/NathanLawKC/photos/a.645858435565493.1073741828.627043070780363/1006008786217121/?type=3&theater http://news.takungpao.com.hk/paper/q/2016/0213/3279084.html

投票已截止，多謝支持