外號「渣男」嘅美國國務卿布林肯，喺4月24日訪華，結果係「瀟灑走一回」，唔單止被質疑要面對「再降格」迎接，而且仲要揮一揮衣袖，不帶走半點成果，皆因成個行程都係食白果，換嚟嘅只有中國一而再，再而三要求美國「脫渣」——脫離渣男行列。

「渣男」老遠而至，既花時間，亦耗燃油，得到嘅只有一肚悶氣。古語有云狗改不了吃……史實話畀大家聽布林肯喺「渣男」方面，就係咁鬼出眾，見完中國官員，悶氣變小器，轉個頭接受BBC訪問，句句夭心夭肺，針對中國。

當指控中國向俄羅斯提供武器零件，用嚟進攻烏克蘭嘅時候，立即「聖人mode」上身，話俄羅斯係歐洲最大嘅安全威脅，仲話如果中國坐視不理，美國將會作出行動。

望住布林肯嘅表情，口中吐出嘅言詞，悲天憫人，大愛氾濫，擔心歐洲，一時之間，布林肯比美國總統拜登更加拜登——語無倫次嘅功力，老頂都望塵莫及。

大愛在中東門前止步

何出此言？皆因「渣男」嘅大愛不出歐洲，喺中東門前止步。

BBC女主持都頂唔順布林肯嘅虛偽，直接咁問加沙而家傷亡慘重，中國點出美國偽君子在於，美國要求中國停止向俄羅斯提供零件；但美國就向以色列輸出武器，咁唔係美國自我打擊可信度咩？

美國勢要做「霸中之霸」，估唔到布林肯都要做「渣中之渣」。自己衰，就將問題歸咎中國，話中國會用盡一切方法扭曲美國嘅政策，又話係要確保以色列能夠自衛，將責任一棍毆落去「哈馬斯」度。

加沙人民集體「被哈馬斯化」？！總之千錯萬錯，我大美帝就係冇錯！

唔單止BBC女主持難忍美國，連中國外交部部長助理華春瑩亦有喺網上轉載片段，直接話主持問咗個好問題，話美國指摘中國嘅時候，自己軍援以色列何嘗唔係延長咗加沙嘅悲劇？又係咪要對當地傷亡負上部分責任？

相信布林肯喺心入面都係嗰四個字︰唔關美事。

BBC女主持嘅難忍；華春瑩嘅嘲諷，布林肯更上一層樓，連以色列總理內塔尼亞胡都唔Like，兜口兜面話，唔會接受以色列同「哈馬斯」嘅協議入面，有條款涉及結束戰事。簡單嚟講，連手下都唾棄你「渣男」。

常言道︰「水退就知邊個冇褲著。」披住光鮮「民主」上衣，喺世界各地擺晒款嘅布林肯，死攬以色列之下，民主退潮，只可以光住下身，死撐話自己美國代表「正義」。

不過一向無賴嘅「渣男」，一次生，兩次熟，三次出醜已麻木，就算喺世人面前展現真性情，光住下身又如何？或者「渣男」都只係No Big Deal啫！

原圖︰布林肯X影片截圖