美國財長耶倫一再強調，若然國會係6月初前，沒有提高債務上限，將無法履行政府職務，屆時政府停擺，分分鐘連軍隊都冇糧出。乜咁大鑊？

事實上，美國經濟陷衰退邊緣，有人指出部分原因係中國持續拋售美債造成嘅連鎖效應，全球最少有16個國家都係在減持美國國債，美元即使提高債務上限而最終獲兩院通過，山姆大叔瘋狂發債，仲有冇人肯買都成疑問。

基於經濟衰退，老美或許急於求見中國咪再拋美債，是以其國務卿一再表態，希望年內獲重新安排訪華。中美關係鬧到咁僵，從今年2月美國炒作「氣球事件」開始，加上老美一直對中國施壓和制裁，明知美國經濟根本不可能同中國脫鈎，卻一直拋出「中國威脅論」而藉機圍堵中國，拉攏日韓菲澳等處處與中國為敵！

呢，美媒早前透露，美國國防部正嘗試安排國防部長奧斯汀和中國國防部長李尚福下月於新加坡會面，阿哥，來唔到中國，咁喺新加坡舉行嘅亞洲安全會議碰個頭也是好，喂，唔通唔記得李尚福早係2018年擔任中央軍委裝備發展部部長時，已經被美國列入制裁名單，理由係中國從俄羅斯進口武器！依家又咁迫切要見一個被你哋制裁嘅「仇家」，山姆大叔究竟知唔知個「醜」字點寫㗎？

筆者也不止一次指出美國言而無信，一味以「美國優先」聲大夾惡，凡事都要有着數才肯做，其自私自私的本性漸暴露，而且愈來愈明顯，尤其對台灣售武，已經到了巧取豪奪嘅地步，有論者甚至指其欲掏空台灣！

呢，美國當台灣係水魚，求其舉個例，好似去年9月賣給台灣嘅「響尾蛇」空對空和「魚叉」反艦兩款導彈，呢啲導彈可以當古董，美軍20多年前都棄用，依家就以11億美元售台，你話是否搵丁搵到出面！各位，美國軍火商食髓知味，最近25家軍火商組團訪台，強化甚麼「台美軍事合作」，其實真正目的，司馬昭之心 ，路人皆知矣！就係對台全力傾銷軍火，進一步掏空台灣，用心之歹毒，台灣嘅民進黨及蔡英文總統難道還看不出來？美國放話欲然大陸解放軍攻台，一定一定唔會畀台灣有事，對南韓、日本、菲律賓又係拍哂心口如何如何會保護其領土安全。山姆大叔完全一付姑爺仔用花言巧語氹無知少女墮落火坑嘅嘴臉，咁都信，太陽早上真係會從西方升起咯！

原圖：素材網、蔡英文Twitter

https://twitter.com/iingwen/status/1642444031962775553/photo/1

文章純屬作者個人意見，並不代表本報立場。