美國空軍上將米尼漢近日喺一份內部文件中警告，中美兩軍或於2025年爆發軍事衝突，台灣附近係最有可能開戰嘅地方，佢敦促美軍部隊做好應戰準備。幾乎與此同時，美國前印太司令部司令戴維森率團出訪台灣，同蔡英文會談外，仲訪問台灣嘅國安會、國防部、陸委會等多個部門，就台海問題交換意見。而戴維森亦曾預測，中美將於2027年開戰。中美關係喺2023年開局未見緩和，反而增加咗劍拔弩張嘅火藥味。美國不斷炒作對華戰爭究竟有何目的呢？

米尼漢認為中美就嚟開戰嘅理據，係台灣將喺2024年舉行地區領導人選舉，美國到時亦會因為舉行總統大選而分心，有可能為解放軍攻台創造條件。美國不斷煽風點火，係咪有信心一定可以擊敗中國呢？答案係未必。美國最大智庫戰略與國際問題研究中心（CSIS）最近公布咗一份兵棋推演報告，經過24輪推演，預測中美台海開戰嘅結果係美軍付出沉重代價後「慘勝」。

但早喺呢份報告之前，美國國防部曾經連續18次模擬中美台海衝突嘅兵棋推演，結果係美軍連輸18場，根本無力阻止解放軍攻佔台灣。而且中國嘅軍力今非昔比，如果喺中國家門口打仗，美軍將會面對強大嘅中國海軍、空軍和火箭軍，喺呢種情況下，美軍毫無優勢，更無可能勝券在握。

睇返美國過去幾十年對外發動戰爭嘅歷史，從未同一個軍事大國直接發生衝突，所有交戰對手都係小國，軍力差距非常懸殊。而台灣只係美國牽制中國嘅一隻棋子，精於計算嘅美國人會唔會為咗保衛一隻棋子，而付出極其巨大嘅代價呢？

其實對於米尼漢嘅言論，美國國內都有唔少反對聲音。眾議院軍事委員會高級成員亞當·史密斯反駁呢種無謂嘅猜想，指責米尼漢，「唔應該話畀全世界知美國將同中國開戰，最重要係我哋並冇咁樣做」。佢仲警告，「唔應該將戰爭衝突嘅言論進一步擴大」，因為只要美國採取正確嘅方式解決問題，「衝突係唔會發生嘅」。北約歐洲盟軍前最高司令斯塔夫里迪斯亦唔認同中美將發生戰爭，他認為備戰係軍方嘅職責，但「與中國發生戰爭嘅概率目前係下降而唔係上升」。

筆者認為，部分美國政客不斷炒作台海危機，目的係要繼續打「台灣牌」壓制中國，為美國國會通過對華強硬法案提供藉口。另外，美國兩黨都將敵視中國視為政治正確，唔排除有政客為咗撈取政治利益而喺台海問題上煽風點火。尤其自從舊年佩洛西竄訪台灣後，美國政客更熱衷於喺呢個話題上造文章，帶動輿論節奏。只要民眾愛睇，自然就選票到手。

無論美國點樣挑釁，中國只要保持歷史耐心同戰略定力，埋頭苦幹，富國強軍，全面趕超美國只係時間問題。到嗰陣時，美國連打嘴炮嘅膽量都冇了，台海問題自然迎刃而解。

原圖：美國空軍機動司令部Twitter
https://twitter.com/AirMobilityCmd/status/1616181424775643140/photo/1