美國對中國的「芯片圍堵」未有消停。近日，美國商務部再將36家中國企業，列入禁止取得美國高科技產品嘅「實體清單」，包括中國長江存儲科技（YMTC）、人工智能技術公司「寒武紀科技」等等。至於打壓理由，美國商務部就搬出用過N次嘅陳詞濫調，「限制中國設法獲得同利用AI等美國先進技術，用於軍隊現代化及侵害人權」。
美國視中國為最強假想敵，想方設法遏制中國科技發展，但越係胡亂出招打壓，就越會遭到反噬，令美國引火燒身。而美國咁急於打壓中國科企，亦證明咗同中國嘅科技競爭中，美國越來越力不從心。
儘管對中國施加嘅晶片制裁不斷升級，但並無達到美國預期嘅效果，好似Intel、AMD、英偉達等晶片巨頭都相繼傳出庫存問題，就連具有壟斷地位嘅高通，都成為美國政策嘅受害者，搞到被聯發科搶咗唔少市場，甚至一度失去全球第一晶片大廠嘅地位。
中國擁有全球最大嘅半導體消費市場，2021年進口晶片高達4,000億美元，佔全球份額60%。美國政府限制美企及其盟友向中國出口晶片，除咗同錢有仇之外，仲打爛埋盟友飯碗。例如，中國係日本同南韓半導體產業嘅主要市場，如果日韓兩國遵照美國要求對中國實施禁運，咁對兩國嘅半導體行業絕對係毀滅性打擊。
又如被台灣人奉為「護國神山」嘅台積電，近日喺美國亞利桑那州興建新廠，美國總統拜登到現場祝賀，仲大肆吹噓政績，高呼「美國製造業返嚟啦！」其實，明眼人都知，美國係想借此掏空台灣嘅晶片產業，難怪面對拜登嘅威逼利誘，台積電創辦人張忠謀只能無奈感歎，「全球化幾乎已死，自由貿易幾乎已死」。
美國係當代全球化嘅始作俑者，喺推動全球化嘅過程中，美國嘅跨國企業賺咗大錢，但就造成製造業空心化嘅後遺症，特朗普同拜登兩屆政府都積極推進逆全球化，其實就係想製造業重返美國，順便可從盟友身上榨取利益，令資金和人才流向美國；同時再出手打壓中國科企發展，令美國得以保持技術領先優勢，都可以話係機關算盡。
但美國棋差一著，就係低估咗中國克服困難嘅毅力。只要回顧中國科技過去70多年嘅發展歷史，就可以明白中國就算一時之間受到好大壓力，但總可以逐步克服困難，取得突破。例如原子彈、航天技術、五代戰機、民航大飛機等等，有邊一樣唔係中國靠自力更生，從而取得同西方大國平起平坐嘅成果？
中國絕不可能因為美國嘅制裁而停滯不前，中國發展嘅態勢係可持續嘅。未來可見，隨著中國科技不斷趕超美國，歐日韓等盟友對美國離心離德，美國嘅科技霸權之路只會越嚟越難行，總有一日會失去優勢。種善恩得善果，美國處處作惡，最終只會害人不成反害己。天理循環，向來如此。
原圖：President Biden Twitter截圖、Donald Trump Facebook
https://twitter.com/POTUS/status/1603163113716649984?s=20&t=mTbaBtRqD9t2HmzBF5n-WQ
投票已截止，多謝支持
返回
