持續已經10個月嘅俄烏衝突，唔單止停火遙遙無期，更加可能無日無之。呢頭12月20號美國總統拜登宣布將提供價值20億美元嘅安全援助畀烏克蘭之後，嗰頭烏克蘭總統澤連斯基喺21號訪美「回禮」。

澤連斯基一如既往獅子大開口，四圍同西方國家要呢樣要嗰樣嘅，作為老大哥嘅美國，梗係要做好表率啦！據了解，美國除咗提供軍備畀烏克蘭之外，仲會提供「愛國者系統」，支持烏克蘭加強防空能力，而且會喺第三國指導烏克蘭官兵操作，繼續同俄軍打落去。

根據一名美國白宮資深官員表示，澤連斯基呢次訪問真係一拍即合。拜登同澤連斯基喺11號煲電話粥傾起件事，13號白宮就正式邀請澤連斯基來訪，18號雙方就扑槌。值得一提嘅係，12月21號係俄烏衝突爆發嘅第300日，老拜同小澤揀正喺呢日到埗，真係畫公仔畫出腸啦。

喺澤連斯基訪美前兩日嘅19號，佢喺拉脫維亞舉行嘅「遠征軍聯合部隊」（JEF）峰會上，澤連斯基用視像形式「攞聖誕禮物」，向各個盟國要求提供更多武器畀烏克蘭。澤連斯基話，如果各國唔幫拖，就冇辦法終止到呢場「歐洲自第二次世界大戰後最致命嘅軍事衝突」喇。

最搞笑嘅係，呢場JEF峰會你估吓牽頭國家係邊個？係「日已落帝國」英國呀！嘩，聽到澤連斯基攤大手板，英國首相辛偉誠可能當堂打個突呀。

澤連斯基不斷向唔同國家要求呢樣嗰樣支援，至少美國仍然願意「慷慨解囊」，最大原因就係，美國希望可以幫澤連斯基保持人設、保持實力，等佢消耗俄羅斯嘅力量，起到「借刀殺人」嘅作用！

係人都知，美國同歐洲各國唔敢同俄羅斯直接開拖，因為當中利益糾纏太多令佢哋淆底。呢個時候澤連斯基聲大大主動要求出擊，真係合晒拜登、辛偉誠佢哋河車。烏克蘭有料到自然好，但就算失敗，對拜登們都唔會有好大損失，因為始終離俄羅斯咁遠，隔岸觀火啫，到時科水軍援吓輕輕帶過就得。只不過，苦就苦咗身處烏克蘭水深火熱中嘅無辜平民啦。

澤連斯基懵盛盛，畀拜登們賣咗仲幫手數銀紙，本俠都真係冇眼睇！

原圖：澤連斯基FB、素材網