美國鐘意插手別國內政係人都知，慣用招數唔係老作就係玩針對。咩國家「瀨嘢」最多？唔使諗都知，中國喺受害國家榜上一定排第一。

近日，美國國防部發表2022年度《中國軍事與安全發展報告》（中國軍力報告），照板煮碗，對中國現代化核建設指手劃腳，「妄想家」上身，冤戾中國嘅國防政策同軍事戰略。咁都未夠，份報告仲喺台灣問題上諸多事實，透過自己強大嘅國際話語權，四圍營造中國軍事威脅論，甚至仲度身訂造針對中國嘅核威懾戰略。

人哋就「能力越大，責任越大」，美帝興玩「能力越大，大話越大」。美國國防部喺呢份中國軍力報告裡面噏得出就噏，話如果照住目前嘅發展速度，2035年中國可能擁有1500枚核彈頭，仲好「擔心」北京方面會對台灣施壓云云，再次完美展現佢有幾咁雙標。根據美國國務院2021年10月公佈嘅數據顯示，美國擁有多達3750枚現役及非現役核彈頭，退一萬步睇，就算中國真係好似美國國防部所講，喺2035年或者會有1500枚核彈頭，乜原來1500係多過3750嘅咩？本俠數口差，真係啱啱先學識咁樣計數喎！唔怪之得美國出咗咁多個數學家啦！

雖然美國都唔係一次半次有口話人冇口話自己，但今次都真係堅離譜。美國擁有全世界最大嘅核武器庫，唔單止冇做好表率，大量減低核彈庫存，反而將佢嘅魔爪伸到距離超過一萬公里以外嘅中國，想蝦蝦蝦霸霸，十足十學堂裡面嘅惡霸玩欺凌。對於美國自作主張單方面指責，6日，中國國防部發言人譚克非作出強硬回應，恥笑呢啲又係美國日常炒作「中國軍事威脅」嘅把戲！

美國對中國嘅核力量建設講三講四，但就唔好好反省下自己，四圍焫火頭，恃住自己聲大夾惡，為咗自己嘅國家私利煽風點火。每次掠完水之後，留返個爛攤子畀人哋執手尾。求其舉例都舉到幾個國家出嚟，伊拉克、阿富汗，邊一個國家唔係畀美國搞到雞毛鴨血？

老美心知肚明，中國唔再美國想搞、就一啲還手力量都冇嘅「東亞病夫」。所以美國揸住張台灣牌，日日搞，月月搞，年年搞，但搞嚟搞去都搞唔出新花臣，淨係識出埋啲低B報告玩抹黑，以為疊多幾份報告，中國就會驚咗你。今時今日咁嘅服務態度係唔夠㗎！

美帝與其再玩冷戰嗰招嚟打壓中國，本俠覺得，小動作無謂，齋噏嘥口水，美國夠膽就喺台海打返一場！美國啱啱出咗B21隱形轟炸機威威豬，好過擺喺度封塵啦！

原圖：Joe Biden Facebook