四年一度嘅美國中期選舉將會喺11月8日舉行。其中令人關注嘅係總統拜登嘅民望，據英國媒體調查顯示，拜登嘅支持度只得39%，逼近今年5-6月支持度36%嘅最低位。中期選舉可以話係拜登嘅期中測驗，呢份成績單會影響兩年後拜登能否繼續冧庄。

拜登管治下嘅美國立立亂，通脹危機、種族歧視、槍械管理等問題越演越烈，究竟拜登今次期中測驗會唔會肥佬？拜登政府仲能唔能夠掌握國會兩院嘅主導？特朗普會唔會趁機捲土重返白宮？嘩，真係好戲連場！

美國期中選舉包括國會及地方選舉。在國會部分，今年眾議院435席全面改選，參議院100席中改選35席；地方部分36州將選出新州長，另有46州88個州議院將進行改選。拜登所屬的民主黨目前雖掌控參、眾兩院，但優勢並唔明顯，喺眾議院只有8席優勢，喺參院席位啱好過半，同共和黨只係叮噹碼頭，半斤八兩。

人衰運起嚟，真係行路都打倒turn。如果今次拜登期中測試成績太差，佢到時可能連跛腳鴨總統都不如，試想，如果拜登政府失守參眾兩院，咁未來兩年白宮嘅政策方案仲點樣順利通過？如果拜登政府去到咁嘅地步，其實都已經名存實亡啦！仲有，依家共和黨好多議員已預先放定風，一旦重新奪回兩院，就要開始彈劾拜登，報彈劾特朗普嘅一箭之仇。所以而家拜登同佢班幕僚都一直諗緊計仔扭轉困局，例如先下手為強，打壓勁敵特朗普。

最近聯邦調查局三番四次咁調查特朗普嘅海湖莊園，搜尋特朗普不法拎走國家機密文件嘅證據，深陷頹勢嘅拜登似乎想借此狠狠一棍打沉即將冒頭嘅侵侵。拜登仲奉行要戰勝對手，先學習對手嘅原則，佢最近仲學侵侵咁勁玩社交平台，從公認嘅「悶蛋」搖身一變成為hit爆嘅「dark brandon」超級英雄形象，順便宣傳佢上任以嚟所做嘅「豐功偉績」。唔係話潑冷水，筆者對於拜登上任之後印象最深刻嘅成績就係廢除墮胎權，呢個決定令大多數美國人都O嗮嘴！

就算拜登如何出盡「冧人」招數，選民都唔係幾Buy，拜登除咗民望繼續插水，佢所屬嘅民主黨支持度亦都畀對家共和黨反超。再加埋各個「藍州」（支持民主黨嘅州份）逐漸轉紅，改撐共和黨，拜登政府已經有種未選先輸嘅勢頭啦！

內有爭奪議會席位鬥不停，外有侵侵攪局蓄勢待發，呢齣美國宮鬥大戲精彩不斷，我哋一於買定花生，放長雙眼等睇好戲啦！

原圖：拜登Facebook圖片