嘩嘩嘩！「長洲覆核王」郭卓堅隨時變身「油塘覆核王」？！話說《大公報》尋日（4日）報道，郭卓堅除咗住喺長洲嗰間涉嫌僭建咗長達13年之久嘅屋之外，喺油塘仲有一間公屋喺手！究竟點解佢長洲有屋都仲有得獲公屋分配單位？對於呢個問題，房屋署就回覆《大公報》，話不評論個別Case，但表明會對懷疑個案展開深入調查，違規行為一經證實，就會採取行動，包括不予警告立即終止租約！

據《大公報》報道，郭卓堅同黃絲KOL曹敏儀係兩公婆！而曹敏儀向該報承認兩人喺上年證實註冊結婚，至今依然係合法夫妻。戲肉跟住嚟喇，曹敏儀鬧爆郭卓堅無情無義，喺佢上年有關明日大嶼嘅司法覆核敗訴後要償還巨額訟費嘅時候，竟然離佢而去。嘩啋，堂堂黃營覆核王嘅郭卓堅，竟然係「渣男」？如果係真嘅，真係幾堅揪喎！

《大公報》向曹敏儀查證有關公屋單位。曹敏儀嘅講法係，郭卓堅間公屋係位於油塘嘅油麗邨信麗樓，並表示「上過兩、三次」，「以為嗰間係居屋，點知係公屋」，又指有關單位嘅電話費網費係用郭卓堅個名。佢都坦言覺得奇怪，點解郭卓堅喺長洲有屋之餘，仲有間公屋，「我諗緊佢攞綜援，可以申請免租」。該報引述公屋樓下嘅保安員表示，郭卓堅好少住喺呢度，多數係佢侄女喺度住。

至於郭卓堅長洲涉嫌僭建嘅住所，據了解已經有13年之久，係長期遺留落嚟嘅問題，亟待解決。

對於郭卓堅有冇霸佔公屋嘅問題，有關部門必須予以查清查楚，令公屋留返畀有需要嘅人士入住！

原圖：大公報、星島日報

https://dw-media.tkww.hk/dams/dwproduct/image/202211/04/6364765de4b03aa1237fc3af_v1.jpg

https://image.stheadline.com/f/1500p0/0x0/100/st/51a92892ff873c977b250edda2d18f0e/stheadline/inewsmedia/20190301/_2019030116040391616.jpeg

https://dw-media.tkww.hk/dams/dwproduct/image/202211/04/636474dde4b03aa1237fc341.jpg