美國1865年廢除奴隸制度，但美式奴隸制度以另一種形式借屍還魂。喺全球經濟瀕臨崩潰嘅呢一刻，世界各國嘅存在價值，原來係割肉捐血供養美國霸權，做美國嘅奴隸。

美國面臨近40年最嚴重嘅通脹危機，9月通脹率高達8.2%，比預期高多0.1個百分點，真係高處未算高。為咗唔畀通脹去到雙位數，美國聯儲局唔使用腦，剩係不斷大幅加息就得㗎喇！有乜嘢好得過既可以救市，又可以損人利己？

普遍估計，嚟緊兩個幾月，聯儲局好大機會繼續喪加息，世界各國嘅經濟肯肯定會雪上加霜。

美國向全世界輸出經濟危機、輸出通脹、輸出恐懼，令到好多傳統智慧失靈。老一輩嘅人總會話，世界唔安寧，黃金至穩陣，但大家有冇發現，就算俄烏打到hehehumhum，股市跌到乒鈴嘭唥，呢排金價冇乜點升，近排現貨黃金價格甚至跌到每安士1,650美元。眾人皆醉，美元獨「升」，當最好嘅避險聖地黃金都唔保險嘅時候，黃金hihi，全球hihi，美元haha，美元嘅霸權地位就更加堅固喇！

「死道友不死貧道」，美國持續加息，某程度上等同進一步榨乾全世界。

點解咁講？睇返今年截至9月27號嘅世界各大貨幣表現，主要貨幣都出現大幅貶值。當正美國係大佬嘅英國、日本，佢哋嘅英鎊、日圓齊齊仆直，貶值幅度超過20%；抗壓能力較強嘅人民幣都貶值咗11.21%；唯獨美元自己好晒，升值18.71%。當匯市壓力山大，美元成為投資首選，於是市場上出現大量購買美元資產、拋售自身國內資產同資金外流嘅情況。呢啲錢主動投懷送抱，向美國霸權供書教學。當市場恐慌情緒高漲嘅時候，呢個情況越嚟越勁。

美國本來好難保住霸權地位，但當煽動咗一場俄烏戰爭，導演咗一場環球經濟危機，美國成功製造咗割韭菜自肥嘅黃金機會。加息累街坊雖然可恥但有用，而且相當有用。大石砸死蟹，美國帶頭搞冧全球經濟，泵水救自己，但你有你鬧，美國仍然繼續加，加加加加加，加到美國吸飽血就加完㗎喇！有乜嘢爽得過我鋸完你一頸血，你仲要無條件好似英國、日本咁繼續做我嘅跟班，想反抗都唔得？咪就係等加息退潮嘅時候鋸多你刀囉！

如果問，美國嘅日子點解咁疏乎？本俠會答：當美國榨乾全世界，當霸權當地球係農場，當美國以外嘅人通通變成霸權私產一樣嘅豬牛羊雞，賣肉賣血賣腎只求取悅美國，咁都唔疏乎，真係有鬼！

原圖：素材網