英國保守黨9月5日宣布卓慧思當選黨魁，成為英國嘅新首相。對於卓慧思入主唐寧街10號，可以話係少人歡喜多人愁，據民調顯示，52%嘅英國人預期佢係差劣甚至極差劣嘅領袖，英國《金融時報》更將佢評為英國「最差首相」嘅競爭者，就連唔少移英黃友對卓慧思當選都唔抱希望。

卓慧思向來靠打「香港牌」氹黃友歡心，佢喺擔任外相期間，多次批評北京對香港政策，仲拍晒心口講「英國唔會放棄香港」，又話要將對華關係提升至「迫切威脅」級別，令中英兩國唔再有經濟夥伴關係。佢仲承諾一上任就立即應對能源危機，幫英國擺脫經濟困境等等等等。雖然講到天花亂墜，但有啲移英黃友偏唔賣帳，質疑佢「咩實質內容都無，顯示自己無能？」仲有人串佢「係咪敢打俄羅斯霸佔油田先？」句句夭心夭肺，點解黃友咁唔妥佢呀？咪就係衝動移民惹的禍囉！

居英港人團體「英國港僑協會」今年5月公布咗一份移英港人心理健康調查報告，用問卷形式訪問咗658個移英港人，呢班受訪者多數係35歲至44歲，大部分喺黑暴之後先移民，到英國唔超過一年。結果發現，有成一半人移民之後有明顯嘅抑鬱症或焦慮症癥狀，普遍遭遇歧視、工作待遇不佳、文化差異等問題，所以唔少人併發產生情緒問題。

前首相約翰遜為咗吸香港水，幫黃友成功「爭取」到BNO中門大開，令好多本來冇能力移民嘅黃友以為「執到寶」，所以唔少黃友將約翰遜奉為再生父母，點知喺英國住落先大呻中伏，物資短缺、能源、食品價格飆升，就業艱難，對於部份本來就冇乜錢揸手嘅黃友嚟講，可以話樣樣插中要害，真係膝頭哥繳眼淚，有苦自己知。

而更令黃友失望嘅係，諗住過到英國追求幻想中嘅自由民主生活。點知落腳先發現，原來多數英國公民都係冇權選首相，因為首相係由執政黨黨魁擔任，而黨魁係由黨員選出。以今次選舉為例，保守黨國會議員提名咗8人入閘，經過多輪投票，最後淘汰剩兩個候選人，然後再由保守黨全體黨員投票選出黨魁。相對英國成7千萬人口，保守黨人數大約只有16萬。黃友成日鬧爆香港小圈子選特首，但勢估唔到自己慘變英國小圈子選舉受害者。送走約翰遜 迎來卓慧思 ，有黃友就感歎，「沒有最差只有更差」。

英女王伊利沙伯二世在位70年，從丘吉爾到卓慧思，換咗15個首相，睇住大英帝國從日不落帝國變咗日暮帝國，而首相嘅素質亦係一蟹不如一蟹，移英黃友誤墮BNO騙局搭咗沉船先知衰。但條路自己揀，揀錯唔好喊，記得千祈咪返香港呀！

原圖：卓慧思Twitter圖片